Biełaruś choča stać suśvietnym kryptachabam: u čym praryŭnaść dekreta «Ab raźvićci ličbavaj ekanomiki»

Alaksandr Łukašenka 22 śniežnia padpisaŭ dekret «Ab raźvićci ličbavaj ekanomiki».

Tekst prajekta dekreta, ź jakim aznajomiłasia «Naša Niva», nasamreč možna nazvać praryŭnym.

Staŭka robicca na spraščeńnie praviłaŭ hulni ŭ biełaruskim PVT dla zamiežnych inviestaraŭ, da taho ž lehalizujucca kryptavaluty. Hłabalny namier palahaje ŭ tym, kab pieraŭtvaryć Biełaruś z krainy «IT-aŭtsorsiera» ŭ samastojnaha hulca, jaki pracuje na siabie, a nie na zamiežnyja kampanii.

Voś asnoŭnyja punkty.

— Ad padatku na dadadzienuju vartaść (PDV) vyzvalajucca zamiežnyja kampanii, jakija akazvajuć rezidentam Parka vysokich technałohij markietynhavyja, rekłamnyja, kansultacyjnyja i inšyja pasłuhi. (Naprykład, dla taho, kab pradać mabilny dadatak, treba kupić rekłamu. Google i Facebook — najbujniejšyja placoŭki. Zhodna ź ciapierašnim zakanadaŭstvam, na kožnyja $100 za rekłamu treba spłacić $20 PDV i $15 padatku na prybytak zamiežnaj arhanizacyi. Kankurenty z zamiežža hetych padatkaŭ nie płociać, što robić niemahčymym prasoŭvańnie praduktu na zamiežnych rynkach. Redakcyja dekreta vypraŭlaje hetuju chibu.)

— Zachoŭvajucca lhoty dla PVT, u pryvatnaści: vyzvaleńnie ad padatku na prybytak i PVD (pa ahulnym pravile). Zamiest hetaha rezidenty vypłočvajuć 1% ad vałavaj vyručki na karyść administracyi PVT; spłata padatku ź fizičnych asobaŭ na panižanaj staŭcy (9%), a taksama ŭnioskaŭ u FSAN, raźličanych ad siaredniaha zarobku pa krainie, a nie ad faktyčnaha (što mienš u 3—4 razy). 

— Rezidenty PVT atrymlivajuć mahčymaść pravodzić apieracyi z elektronnymi hrašyma biez šerahu raniejšych abmiežavańniaŭ, biez dazvołu Nacbanka adkryvać rachunki ŭ zamiežnych bankach, pravodzić hrašovyja apieracyi z rucham kapitału tolki ŭ paviedamlalnym paradku, składać pieršasnyja ŭlikovyja dakumienty adzinaasobna. (Padkreślivajecca, što zakanadaŭstva ab kantroli za zamiežnahandlovymi apieracyjami na rezidentaŭ PVT nie raspaŭsiudžvajecca.)

— Asobnym punktam u dekrecie adznačajecca mahčymaść inviestavać u PVT pa brytanskim pravie i zaklučać damovy, jakija vykarystoŭvajucca ŭ mižnarodnym biznesie: pahadnieńni ab pradastaŭleńni apcyjona na zaklučeńnie damovy i apcyjonnyja damovy, damovy kanviertavanaha zajma, pahadnieńni ab kampiensacyi majomasnych strat, pahadnieńni ab adkaznaści za pieramańvańnie rabotnikaŭ, non-compete pahadnieńni z rabotnikami z vypłataj im kampiensacyj za pieryjad dziejańnia non-compete abaviazkaŭ.

— Rezidentam PVT taksama spraščajuć rekrutynh zamiežnych śpiecyjalistaŭ: dla takich zamiežnikaŭ skasoŭvajucca vizy, a ich najmalnikam nie treba budzie atrymlivać dazvoły, źviazanyja z pryjomam na rabotu hramadzian inšych krain.

— U Biełarusi całkam lehalizujucca ličbavyja valuty i tokieny, stvarajucca ŭmovy dla ŭciahnieńnia kryptavalut u cyvilnaje abaračeńnie. U pryvatnaści, majninh (zdabyćcio elektronnych hrošaj) nie pryznajecca pradprymalnickaj dziejnaściu, dekłaravańnie kryptavalut fizičnymi asobami niepatrebna, tokieny možna kuplać, pakidać u spadčynu, abmieńvać na realnyja hrošy i hetak dalej (ale ŭsie apieracyi z kryptavalutami buduć ažyćciaŭlacca praz rezidentaŭ PVT, kab adkinuć machlaroŭ — heta stanie dadatkovaj harantyjaj, čaho niama ni ŭ adnoj krainie). Prynamsi da 1 studzienia 2023 hoda hetaja dziejnaść nie abkładajecca padatkami.

Pa acenkach, paśla pryniaćcia dekreta i da 2030 hoda ličba zaniatych u IT vyraście da 100 tysiač čałaviek (suprać 30 tysiač ciapier), abjom ekspartnaj vyručki maje vyraści da $4,7 miljardaŭ na hod (suprać $1 miljarda ciapier), zamiežnyja inviestycyi majuć vyraści na $3,2 miljarda — da $4 miljardaŭ.

Taksama važna, što ŭmovy dopusku ŭ PVT zastajucca raniejšymi — tolki pravieranyja firmy zmohuć pracavać u takim režymie. Pry hetym pašyrajucca śfiery dziejnaści PVT: raspracoŭka bieśpiłotnaha transpartu, štučnaha intelektu, miedycynskija i bijatechnałohii, avijacyjnyja i kaśmičnyja raspracoŭki.

IT-supolnaść miarkuje, što kali dekret budzie pryniaty ŭ poŭnym vyhladzie, to heta zrobić Biełaruś lidaram u rehijonie pa viadzieńni IT-biznesu.

• 0
• 0
• 0
• 0
• 0
• 0
• 0
• 0