Jeŭrapiejskaja kamisija patrabuje ad sacyjalnych sietak uzmacnić baraćbu ź nielehalnym kantentam, u pryvatnaści ŭvieści karotkija terminy dla jaho vydaleńnia. Pra heta paviedamlaje EUobserver.
U aŭtorak u Bruseli adbyłasia zakrytaja sustreča niekalkich jeŭrakamisaraŭ i pradstaŭnikoŭ kala 20 kampanij pa supraćdziejańni raspaŭsiudu nielehalnaha kantentu.
Kamisar ES pa ŭnutranych spravach Dmitrys Aŭramopułas adznačyŭ, što vydaleńnie padobnaj infarmacyi nie pavinna zajmać bolš za dźvie hadziny.
«Infarmacyja ab vydalenym źmieście pavinna być pieradadziena pravaachoŭnym orhanam, kab u dalejšym jana mahła być vykarystana ŭ jakaści dokazu ŭ praviadzieńni rasśledavańniaŭ», — skazaŭ jon.
Heta patrabavańnie źjaŭlajecca častkaj bolš šyrokich namahańniaŭ ES prymusić kampanii prymać bolš chutkija dziejańni suprać internet-kantentu, jaki schilaje da nianaviści, hvałtu i teraryzmu.
Jeŭrakamisija ŭ vieraśni minułaha hoda zajaviła, što «toje, što niezakonna ŭ afłajnie, taksama źjaŭlajecca niezakonnym u internecie», choć nacyjanalnyja praviły mohuć adroźnivacca pa adnym i tym ža źmieście.
Internet-płatformam pryjdziecca ŭličvać praviły asobnych krain-členaŭ, kab zrazumieć i skarystacca adpaviednymi dziejańniami, a zatym vyrašyć, ci treba vydalić infarmacyju.
«Siońnia my abmiarkoŭvali z pradstaŭnikami haliny nieabchodnaść bolš chutkich dziejańniaŭ, kali heta mahčyma na dobraachvotnaj asnovie, ale, kali nieabchodna, my razhledzim dalejšyja kroki», — skazaŭ paśla sustrečy jeŭrakamisar pa pytańniach biaśpieki Džulijan Kinh.
Kamientary