Śledčy kamitet zavioŭ kryminalnuju spravu pa padazreńni va ŭchileńni ad vypłaty padatkaŭ u dačynieńni da kampanii «NP-Servis» Ivana Bierazoŭskaha — paviedamlaje Tut.by sa spasyłkaj na krynicy, znajomyja ź situacyjaj u kampanii. Fakt zaviadzieńnia kryminalnaj spravy ŭ dačynieńni da ŭładalnika bujnoha rytejlera paćvierdzili i ŭ SK.
«Kryminalnaja sprava zaviedzienaja pavodle č.2 art. 243 (Uchileńnie ad vypłaty padatkaŭ u asabliva bujnym pamiery) Kryminalnaha kodeksa Biełarusi. Pa daručeńni śledčych supracoŭnikami HUBAZiK MUS u miežach hetaj kryminalnaj spravy ŭ ofisnych pamiaškańniach kampanii byli praviedzieny pracesualnyja dziejańni, heta značyć pieratrusy», — paviedamiŭ aficyjny pradstaŭnik Śledčaha kamiteta Biełarusi Siarhiej Kabakovič.
«NP-Servis» zajmajecca dystrybucyjaj tavaraŭ charčovaj hrupy. Saŭładalnik kampanii, Ivan Bierazoŭski taksama kantraluje sietku z bolš čym 50 charčovych kramaŭ «Chatni» i univiersam «Centralny» ŭ Minsku.
«U piatnicu ŭ kampanii, bujnoha dystrybutara, dzie pracuje 2,5 tysiačy čałaviek, aryštavali rachunki. Suma pretenzij, nakolki viadoma, mienš za 1 młn dalaraŭ. Heta mizer dla kampanii, jakaja stolki padatkaŭ płacić mienš čym za miesiac. Zrazumieła, što mohuć być padatkovyja pretenzii da kampanii, ale niezrazumieła, navošta paralizoŭvali jaje pracu, ładzili maski-šou. Tym bolš kali ŭ minułym hodzie tak hučna zajavili pra libieralizacyju i dekryminalizacyju ŭ dačynieńni da biznesu», — prakamientavaŭ surazmoŭca, znajomy ź situacyjaj.
U Śledčym kamitecie ŭ svaju čarhu padkreślili, što sa svajho boku pradprymajuć usie mahčymyja miery, z ulikam śledčaj situacyi, dla zabieśpiačeńnia bieśpierabojnaj pracy i narmalnaha funkcyjanavańnia subjekta haspadarańnia.
Sam Ivan Bierazoŭski pavodle Tut.by znachodzicca ŭ Łondanie. Bierazoŭski zajmaje 61-ju pazicyju ŭ top-200 najbolej upłyvovych biznesoŭcaŭ Biełarusi pavodle «Ježiednievnika».
Kamientary