Marsachod Opportunity śviatkuje 5000 dzień svajoj pracy na Marsie
Płanietachod-vieteran Opportunity, jaki prybyŭ na pavierchniu Čyrvonaj płaniety 25 studzienia 2004 hoda, śviatkuje 16 lutaha svoj piacitysiačny dzień (pavodle praciahłaści ziamnych sutak) pracy na Marsie, paviedamlaje NASA.
«Praź piać tysiač dzion paśla pačatku hetaj 90-dzionnaj misii, naš dzivosny płanietachod praciahvaje ździŭlać nas i ŭvieś čas znachodzić na pavierchni Marsa niešta novaje», — raspavioŭ kiraŭnik misii Džon Kałas z Łabaratoryi reaktyŭnaha ruchu NASA ŭ Pasadenie (ZŠA).
Marsachod Opportunity, jaki pracuje na pavierchni Marsa ŭžo 13 hadoŭ, paśpiachova pieražyŭ samyja ciažkija miesiacy marsijanskaj «zimy» — samaha chałodnaha i ciomnaha času hoda, kali čyrvonaja płanieta maksimalna daloka addalajecca ad Sonca. Dziakujučy niečakanaj ačystcy jaho soniečnych batarej paryvami marsijanskaha vietru, płanietachod praktyčna nie spaŭ padčas hetaj zimoŭki i vyvučaŭ pavierchniu Marsa navat u samyja chałodnyja dni i tydni.
Pieršapačatkova śpiecyjalisty NASA płanavali, što marsachod prapracuje ŭsiaho try miesiacy, adnak jon voś užo katory hod praciahvaje stavić usio novyja rekordy. Opportunity ciapier znachodzicca ŭ vydatnym stanie, i jaho pracazdolnaść, paśla niadaŭniaha pierafarmatavańnia pamiaci, znachodzicca na piku mahčymaściaŭ.
Svoj piacitysiačny dzień pracy na Marsie Opportunity sustrenie na krai kratara Indevar, jaki jon vyvučaje ŭžo niekalki hadoŭ. Ciapier jon znachodzicca ŭ tak zvanaj dalinie Stojkaści — nizinie daŭžynioj u niekalki kiłamietraŭ — i ruchajecca ŭ bok inšaj daliny, Viłamiet, dzie spadarožniki znajšli ślady irvoŭ, jak miarkujecca, prakapanych patokami vady.
Užo ciapier navukoŭcy znajšli niekalki radoviščaŭ niezvyčajnych słaistych minierałaŭ, jakija dahetul nie sustrakalisia na Marsie i jakija, jak miarkujecca, farmujucca tolki ŭ prysutnaści vady. Ich vyvučeńnie ŭ piacitysiačny dzień žyćcia Opportunity na Marsie dazvolić nablizicca da razhadki tajamnicy ich farmiravańnia i pošuku mahčymych krynic vadkaj vady na Čyrvonaj płaniecie.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty41
Kamientary