«My z vami»: palaki jeduć u Hajnaŭku padtrymać biełarusaŭ i pratestavać suprać maršu pamiaci Buraha VIDEA
Hramadzianski ruch «Hramadzianie RP» («Obywatele RP») zaklikaŭ palakaŭ źjechacca ŭ Hajnaŭcy, kab pratestavać suprać maršu pamiaci Buraha, jaki pravodziać polskija krajnie nacyjanalistyčnyja koły.
«Hramadzianie RP» zapisali videazvarot na Jutubie, dzie, siarod inšaha, havorycca: «My pryjazdžajem, kab pakazać, što vy [biełarusy] nie adny. I budziem pryjazdžać stolki, kolki vam budzie pahražać fašyzm».
Adzin z aktyvistaŭ na videa cytuje vierš Niła Hileviča «Ty kažaš, ja nie viedaju vajny»:
Ja adnaho chaču, maja kraina:
Kab heta skončyłasia ŭsio na mnie.
Kab heta ŭsio nie stała dolaj syna.
Marš pamiaci Buraha pravodziać pravyja radykały. Jany nazyvajuć heta «Maršam vyklatych žaŭnieraŭ» («praklatych sałdataŭ»). Tak u Polščy mietafaryčna nazyvajuć antysavieckich i antykamunistyčnych partyzanaŭ paślavajennaha času.
Ramuald Rajs pa mianušcy «Bury» — heta kamandzir adnaho z takich antykamunistyčnych partyzanskich atradaŭ. Atrad Buraha ŭ 1945—1948 ździajśniaŭ na Padlaššy taksama masavyja zabojstvy miascovych pravasłaŭnych. Takim čynam, polskija partyzany imknulisia adstrašyć nasielnictva ad supracy z kamunistyčnymi ŭładami i vyklikać emihracyju biełarusaŭ i ŭkraincaŭ z Padlašša ŭ SSSR. Bandyty Buraha zabivali ŭsich, chto nie moh zhavaryć katalickaj malitvy pa-polsku. Ahułam zahinuła 79 čałaviek.
Hajnaŭka, haradok kala Biełaviežskaj puščy, heta adzin z centraŭ kampaktnaha pražyvańnia biełarusaŭ u Polščy.
Cikava, što Nacyjanalny ruch, jaki arhanizoŭvaje šeście ŭ Hajnaŭcy, pavodle niekatorych źviestak, finansujecca z Maskvy, jak i šerah inšych pravaradykalnych ruchaŭ Jeŭropy. Rasśledavańni «Našaj Nivy» vyjavili, što rasijskija hrošy vykarystoŭvalisia, u pryvatnaści, dla arhanizacyi antyŭkrainskich akcyj u Polščy.
U toj ža čas Marš pamiaci Buraha asudžajuć jak polskija libieralnyja, tak i kansiervatyŭnyja koły. U 2017 hodzie prezident Polščy Andžej Duda demanstratyŭna admoviŭsia ŭziać patranaž nad maršam pamiaci Buraha.
Ciapier čytajuć
«Kab Biełaruś nie addali Pucinu ŭ jakaści suciašalnaha pryza». Cichanoŭskaja zaklikaje ŭklučyć biełaruskaje pytańnie ŭ mirnyja pieramovy Ukrainy i Rasii2626
Kamientary