Dźmitry Hurnievič: Piać uražańniaŭ ad strymu nakont Dnia Voli i adno pytańnie
Žyvuju tranślacyju z pasiedžańnia arhkamitetu śviatkavańnia 100-hodździa niezaležnaści BNR ja vyklučyŭ paśla 2 hadzin 15 chvilin. Kali palityki nia mohuć damovicca nakont takoj nasamreč drobnaj spravy, to jak vyhladajuć ichnyja stratehičnyja pieramovy, ad jakich sapraŭdy moža zaležać los krainy?
1. U sustrečy było kankretnaje pytańnie — što rabić z prapanovaj Mienharvykankamu nakont 25 sakavika. Amal dźvie hadziny zaniało pieraŭtvareńnie rabočaj hrupy ŭ arhkamitet i nadańnie paŭnamoctvaŭ hrupie na pieramovy ź Mienharvykankamam. Ludzi, jakija, ahułam kažučy, vyjšli z adnoj palityčnaj kampanii 90-ch hadoŭ, pavodzili siabie tak, nibyta jany pradstaŭniki nacyjanalnych uradaŭ na samicie Eŭraźviazu, dzie vyrašajecca pamier datacyjaŭ na piacihodku. I tamu kožny namahaŭsia baranić svoj intares i redka čuŭ inšaha.
2. Udzielniki sustrečy — pavažanyja, razumnyja i samaachviarnyja ludzi. Ale kali jany źbirajucca razam, to adbyvajecca niešta niezrazumiełaje. A to ŭščyknuć adzin druhoha, papraknuć, skrytykavać, uzhadać staruju kryŭdu, skryvicca, pačać havaryć pra 90-ja, zakatać vočy ŭ łob, niešta ŭspomnić z maładości, kinuć pafas, uźniać hołas.
3. Sprečki na pustym miescy dobra hladziacca ŭ demakratyčnym parlamencie, dzie deputaty chočuć kazać svaju dziorzkaść i aryhinalnaść pierad vybarnikami. Ale kamu patrebnaje šoŭ na pasiedžańni arhkamitetu śviatkavańnia 100-hodździa BNR?
4. Palityka — heta mastactva mahčymaha. I heta ŭ zali, na žal, pakazali adzinki. Ad hetych adzinak možna było pačuć sapraŭdny kłopat i dbańnie pra intares Dnia Voli i jaho ŭdzielnikaŭ. Rešta pavodziła siabie niby padčas vybarčaj kampanii ŭ parlament. I pryčyna ŭ adsutnaści davieru adzin da druhoha, u niezrazumiełaj kankurencyi nieviadoma za što.
5. Kali biełaruskaja demakratyčnaja apazycyja sapraŭdy choča kali-niebudź vyjhrać u svabodnych vybarach, to joj treba terminova zabaranić telekameram prysutničać na svaich pasiedžańniach. Abo prosta pačać razmaŭlać pamiž saboj pa-inšamu. Ale pieršaje chiba pakul bolš realnaje.
Čaho tady vartyja ŭsie biełaruskija demakratyčnyja partyi, ruchi, kaalicyi, arhkamitety, arhanizacyi, supołki, kali ich navat 100-hodździe BNR nia ŭ stanie abjadnać?
Kamientary