Wizz Air skasoŭvaje biaspłatnuju pieravozku ručnoj pakłažy ŭ sałonie: abo płaci, abo zdavaj u bahaž
Vienhierski łaŭkostar Wizz Air znoŭ mianiaje praviły pravozu ručnoj pakłažy ŭ svaich samalotach. Zaraz biaspłatna pranosić sumku ŭ sałon zmohuć tolki tyja pasažyry, jakija kupili pasłuhu Wizz Priority, pieradaje partał 34travel.me.
U kastryčniku 2017 hoda avijapieravozčyk zasmuciŭ mnohich svaich prychilnikaŭ, kali ŭvioŭ novy standart biaspłatnaj ručnoj pakłažy i abmiežavaŭ kolkaść ludziej, jakija mohuć biaspłatna pranieści hety bahaž u sałon samalota. Tady prava pravozić ručnuju pakłažu ŭ sałonie atrymali tolki pieršyja 90 pasažyraŭ rejsa, u tym liku tyja, chto apłaciŭ pasłuhu Wizz Priority.
I voś siońnia ŭ Wizz Air zajavili, što płanujuć zachavać prava pieravozki ručnoj pakłažy ŭ sałonie samalota tolki za tymi pasažyrami, jakija apłaciać opcyju Wizz Priority. Ručnuju pakłažu pasažyraŭ, jakija nie nabyli pasłuhu pryjarytetnaj pasadki, buduć zahružać u bahažny adsiek. Paśla pryziamleńnia jaje padaduć na bahažnuju stužku.
Uzmacnieńnie žorstkaści pravił u Wizz Air abhruntavali adsutnaściu dastatkovaha miesca ŭ sałonach samalotaŭ.
Nahadajem, što pasłuha Wizz Priority nadaje prava pieršačarhovaha prachodu ŭ sałon samalota i mahčymaść pranieści na bort ručnuju pakłažu (55x40x23 sm, da 10 kh), a taksama maleńkuju sumku 40x30x18 sm (naprykład, łeptop abo fotaaparat). Pry hetym Wizz Priority nie daje nijakich pieravah, kali rehistruješsia na rejs i prachodziš pieradpalotny nadhlad.
Pryjarytetnuju pasadku Wizz Air možna apłacić na etapie braniravańnia kvitkoŭ abo dadać paźniej u asabistym kabiniecie na sajcie pieravozčyka. Taksama jaje možna zamović u aeraporcie pa bolš vysokim taryfie. Kali kupić pasłuhu anłajn abo praz koł-centr Wizz Air, jana abydziecca ŭ €5—10. Kali daciahnuć da samoha aeraporta, pryjdziecca vykłaści €25.
Ciapier čytajuć
«Dziela svaich dzietak, kab da ich viarnucca». Daškievič raskazaŭ, jak trapiŭ u «nizki status» i napisaŭ prašeńnie ab pamiłavańni8
Kamientary