Jak zapuskać drony, kab vas nie pasadzili

Sajt vsr.mil.by źmiaściŭ pieralik dziejnych u Biełarusi patrabavańniaŭ da ŭžyvańnia dronaŭ i avijamadelaŭ. Prapanujem vašaj uvazie asnoŭnyja momanty.

Pavialičyć

Drony zaraz nabyvajuć usio bolšuju i bolšuju papularnaść. U suviazi z hetym pavialičyłasia i kolkaść nieparazumieńniaŭ pamiž ułaśnikami dronaŭ i dziaržaŭnymi strukturami, jakija kantralujuć pavietranuju prastoru. Źvierniemsia da zakanadaŭstva Biełarusi, kab vyznačyć, što adroźnivaje vaš dron ad avijamadeli abo bieśpiłotnaha latalnaha aparatu.

U adpaviednaści z abzacam druhim artykuła 1 Pavietranaha kodeksa Biełarusi, pad avijamadellu razumiejecca latalny aparat biez čałavieka na borcie, kiravańnie palotam jakoha mahčyma tolki pry ŭmovie vizualnaha kantaktu ź im, a taksama niekiravany svabodnalatajučy aparat. Źviarnicie ŭvahu na słovy «kiravańnie palotam jakoha mahčyma tolki pry ŭmovie vizualnaha kantaktu ź im». Heta aznačaje, što kali vaš robat zdolny latać tolki pry ŭmovie vizualnaha kantaktu, umoŭna vykonvajučy pryncypy «niepasredna baču dron — maju mahčymaść kiravać im», «niepasredna nie baču drona — nie maju mahčymaści kiravać im», to tady jon źjaŭlajecca avijamadellu. Akramia hetaha, asobna zhadajem latalnyja aparaty, jakija nie źjaŭlajucca dronami-avijamadelami, ale taksama adnosiacca da kłasa avijamadelaŭ: pavietranyja źmiei, latalnyja madeli płanieraŭ, rakiety, radyjokiravanyja madeli samalotaŭ i viertalotaŭ (jakija mohuć lotać taksama tolki va ŭmovach vizualnaha kantaktu), roznyja kordavyja avijamadeli.

Ciapier raźbiarom toj vypadak, kali dron užo nie avijamadel. Tut usio taksama dosyć prosta: kali jon moža latać bieź vizualnaha kantaktu ź im, naprykład, z dapamohaj pulta dystancyjnaha kiravańnia, FPV-akularaŭ, noŭtbuka, płanšeta, mabilnaha telefona (inšaj pryłady, jakaja vykarystoŭvajecca ŭ jakaści pulta dystancyjnaha kiravańnia), što maje ŭbudavany ekran, jaki adlustroŭvaje karcinku z kamiery, ustalavanaj na dron, heta ŭžo bieśpiłotny latalny aparat. U adpaviednaści z abzacam 19 artykuła 1 Pavietranaha kodeksa Biełarusi bieśpiłotny latalny aparat — heta pavietranaje sudna, pryznačanaje dla vykanańnia palotu biez ekipaža na borcie. Zapomnim hetaje aznačeńnie i pahavorym pra jaho nižej.

Takim čynam, kali dron adnosicca da kłasa avijamadeli, to da vas jak da karystalnika dadzienaj avijamadeli, u zakanadaŭstvie našaj krainy vystaŭlajucca nastupnyja patrabavańni:

1. vykarystoŭvać avijamadel na vyšyni, jakaja nie pieravyšaje 100 mietraŭ ad uzroŭniu ziamnoj (vodnaj) pavierchni;
2. nie vykarystoŭvać jaje ŭ miežach zon, zabaronienych dla vykarystańnia avijamadelaŭ biez uzhadnieńnia ź dziaržaŭnymi arhanizacyjami, u intaresach jakich ustanoŭleny takija zony, ź imi možna aznajomicca na sajcie Nacyjanalnaha kadastravaha ahienctva — map.nca.by/map.html;
3. nie vykarystoŭvać jaje ŭ vypadkach, jakija vyznačajucca Słužbaj biaśpieki prezidenta;
4. nanieści razborliva markiroŭku (ustojlivuju da atmaśfiernych apadkaŭ) na bačnaj častcy avijamadeli (masaj bolš za 0,5 kh) abo na jaje schavanych častkach, da jakich mahčymy dostup biez vykarystańnia instrumientaŭ i jakaja budzie ŭtrymlivać vašyja proźvišča, ułasnaje imia, imia pa baćku, adras miesca žycharstva abo najmieńnie jurydyčnaj asoby i jaho miescaznachodžańnie;
5. prymać usie mahčymyja miery (ažno da spynieńnia vykarystańnia avijamadeli) u vypadku ŭźniknieńnia pahrozy pryčynieńnia škody žyćciu, zdaroŭju i majomaści fizičnych i jurydyčnych asob.

Usie pieraličanyja patrabavańni ŭtrymlivajucca ŭ Praviłach vykarystańnia avijamadelaŭ, zaćvierdžanych pastanovaj Savieta ministraŭ ad 16 žniŭnia 2016 h. № 636.

Parušeńnie praviłaŭ vykarystańnia avijamadelaŭ ciahnie za saboj administracyjnuju adkaznaść, praduhledžanuju artykułam 18.41 Kodeksa ab administracyjnych pravaparušeńniach, u vyhladzie papiaredžańnia abo nakładańnia štrafu ŭ pamiery da 20 bazavych vieličyń, a na jurydyčnuju asobu — u vyhladzie papiaredžańnia abo nakładańnia štrafu da 50 bazavych vieličyń. Kali vy paŭtorna na praciahu hoda ździejśnicie takoje ž pravaparušeńnie, to dla fizičnaj asoby štraf užo budzie składać ad 10 da 50 bazavych vieličyń, a dla jurydyčnaj asoby — ad 20 da 100 bazavych vieličyń.

• 0
• 0
• 0
• 0
• 0
• 0
• 0
• 0