Chłopiec, ź jakoha pačaŭsia chapun u Žabincy: Ja prosta padyšoŭ da daišnika spytać, što čuvać
Paśla publikacyi «Śviatkavańnie Dnia horada ŭ Žabincy skončyłasia sutyčkami z AMAPam i milicyjaj» u Redakcyju źviarnuŭsia chłopiec, jakoha zatrymali pieršym. Z hetaha ŭłasna i pačalisia inšyja zatrymańni moładzi.
Małady čałaviek nazvaŭsia Stasiem, jon raspavioŭ svaju historyju incydentu. «My siadzieli na centralnaj płoščy, tam byli stoliki z baram, ja vypivaŭ piva. Na stajancy na płoščy znachodziŭsia supracoŭnik DAI.
Ja padyšoŭ da jaho i spytaŭ: «Što čuvać?» Jon kaža: «Chočaš daviedacca, što ŭ mianie čuvać, — zaraz daviedaješsia». Siadaje ŭ mašynu, dastaje kajdanki, chapaje mianie za ruku. Ja prymaju ruku, jon razzłavaŭsia, sieŭ u mašynu i źjechaŭ», — raskazvaje svaju viersiju Staś.
«Paśla ad płoščy my pajšli na tancplacoŭku. Tam padbiehli dvoje supracoŭnikaŭ milicyi, udaryli mianie pa nahach, zatrymali. Kali mianie viali, to stali padychodzić ludzi, jakija cikavilisia, što zdaryłasia. Milicyi nie spadabałasia, što ŭsie zdymali, pytalisia. Na hetym pačałosia biasčynstva. Pačali zabirać telefony, bili ŭsich zapar. Chto mima navat prachodziŭ — pajechaŭ u milicyju», — kaža chłopiec.
Stasia ź milicyi adpuścili a 8 ranicy. «Nas usich pabili. Heta zrazumieła. I ŭ mašynie bili, i ŭ milicyi bili. I navat nie tłumačyli, za što zabirajuć. Na mianie aformili pratakoł za raśpićcio ałkaholnych napojaŭ — dali 5 bazavych vieličyń. U mianie pieršy pratakoł u žyćci za raśpićcio. Ahlad pakazaŭ, što ŭ mianie ŭ kryvi 0,4 pramile ałkaholu — heta kufal piva», — kaža ŭdzielnik incydentu.
Usiaho na śviatkavańni Dnia horada ŭ Žabincy było zatrymana 7 čałaviek. Prynamsi adzin ź ich usio jašče znachodzicca ŭ izalatary pa padazreńni va ŭžyvańni siły suprać supracoŭnika milicyi.
Žabinka — heta rajonny centr u Bresckaj vobłaści.
Čytajcie taksama:
Śviatkavańnie Dnia horada ŭ Žabincy skončyłasia sutyčkami z AMAPam i milicyjaj
Siłaviki raskazali svaju viersiju chapunu ŭ Žabincy
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami32
Kamientary