Śviatkavańnie Dnia horada ŭ Žabincy skončyłasia sutyčkami z AMAPam i milicyjaj

Jak stała viadoma «Našaj Nivie», śviatkavańnie Dnia horada ŭ Žabincy 21 lipienia skončyłasia masavymi zatrymańniami. Prynamsi adzin čałaviek nie adpuščany ź izalatara da hetaha momantu.

Pavialičyć

U hety viečar na haradskoj płoščy kancert davaŭ viadomy hurt «Ciahni-šturchaj», a 23-j hadzinie byŭ zapłanavany fiejervierk. Viadoma, što śviatkavańnie zaciahnułasia hłyboka za poŭnač.

Prykładna paśla pieršaj hadzinie nočy tyja, chto praciahvaŭ adznačać Dzień horada, zaŭvažyli, što supracoŭniki milicyi zatrymali i paviali ŭ mašynu adnaho z chłopcaŭ. Dakładna nie viadoma, što zdaryłasia. Pa adnoj ź viersij, hety maładzion pieravysiŭ chutkaść, pryparkavaŭ mašynu ŭ dvarach, a kali pryjšoŭ na hulańni, to jaho apieratyŭna źvincili.

Dyk voś, žychary Žabinki stali zdymać heta zatrymańnie na telefony. U vyniku tych, chto filmavaŭ zdareńnie, taksama zabrali na noč u pastarunak.

U toj dzień u Žabincy pracavała nie tolki miascovaja milicyja, ale i brescki AMAP.

Artur R. byŭ adnym z tych, chto trapiŭ pad razdaču supracoŭnikaŭ pravaachoŭnych orhanaŭ. «Ja navat nie ŭjaŭlaju, što tam było. Mianie ciaham piaci chvilin źviazali, a paśla pavieźli ŭ milicyju. Trymali da siomaj hadziny ranku. Praviali dopyt, pytalisia, što adbyłosia. My ž prosta chacieli ŭbačyć, kaho tam zatrymali», — raskazvaje śviedka.

Pa słovach Artura, u milicyi takich, jak jon, było kala 7-8 čałaviek. «Trymali ŭ kajdankach, pyrsnuli bałončykam u vočy. U mianie aniamieŭ palec, było kiepska ŭ milicyi», — raskazvaje Artur.

Natalla Kryvaručka raskazała nam, što jaje syn Pavieł usio jašče znachodzicca pad vartaj u Breście. Advakatam dali infarmacyju, što chłopca pavinny adpuścić zaŭtra paśla 14-j hadziny.

«Zatrymlivali chłopca, i moj syn pačaŭ zdymku. Amapaviec vybiŭ u jaho telefon z ruk. Pačali krucić. Chłopcaŭ źbivali i ŭ aŭtobusie, i ŭ samoj milicyi. Ni za što, prosta jany bačyli zatrymańnie», — raskazvaje spadarynia Natalla.

Ciapier na chłopca mohuć zavieści kryminalnuju spravu pa artykule 363 Kryminalnaha kodeksa «Supraciŭ supracoŭniku orhanaŭ unutranych spravaŭ». «Paŭłu prypisvajuć, što jon udaryŭ amapaŭca i paškodziŭ bus. Ni taho, ni druhoha jon nie rabiŭ! U mianie jość videa tych zdareńniaŭ, ja sabrała šmat u kaho», — raskazvaje maci zatrymanaha.

«Jość śviedčańnie źbićcia, ja akurat tady była ŭ pryjomnym pakoi milicyi», — raskazvaje Natalla Kryvaručka.

Alaksandr P. kaža, što isnuje pahroza, što suprać jaho taksama mohuć zavieści kryminalnuju spravu:

«Mnie kažuć, što ja spačatku nakinuŭsia na amapaŭca i dušyŭ jaho, a paśla dušyŭ niejkaha milicyjaniera, ale ja hetaha nie rabiŭ! U mianie vaha 70 kiłahramaŭ, ja jašče byŭ vypiŭšy. A tam amapaviec u try razy bolšy za mianie. Ja ŭ žyćci nikoli nie biŭsia!

Śviedka kaža, što bačyŭ mianie zdalok, ale tvaru nie bačyŭ. Jany sami sabie supiarečać. Ja prosta prachodziŭ pobač, kali paviali zatrymanaha. Mianie schapili zzadu i pačali ciahnuć kudyści. Kaniečnie, ja sprabavaŭ vyrvacca, ale mianie ŭdaryli i pavalili na ziamlu», — raskazvaje chłopiec.

«U milicyi my ŭvieś čas stajali tvaram da ścienki na kalidory. Paprasiŭ pazvanić, ale mnie skazali, što nielha. My ŭsie byli ŭ kajdankach. Siłu nie prymianiali, ja tolki adzin raz paviarnuŭsia i mianie adrazu hałavoj da ściany, kab viedaŭ, jak pravilna stajać. Heta zrabiŭ niechta z AMAPu. Mnie nie skazali, u jakaści kaho prachodžu pa spravie. Zusim niezrazumieła ničoha», — havoryć Alaksandr.

U Žabinkaŭskim RAUS kamientavać spravu admovilisia. «Telefanujcie ŭ Brest, my ničoha nie skažam», — paraili jany.

Źviazacca z pres-słužbaj UUS Bresckaha abłvykankama pakul nie ŭdałosia. Sprava ŭ tym, što ŭ Breście prachodzić kalehija UUS abłvykankama z udziełam ministra Ihara Šunieviča. «NN» prainfarmuje ab aficyjnaj pazicyi viedamstva.

Čytajcie taksama:

Chłopiec, ź jakoha pačaŭsia chapun u Žabincy: Ja prosta padyšoŭ da daišnika spytać, što čuvać

Siłaviki raskazali svaju viersiju chapunu ŭ Žabincy

• 0
• 0
• 0
• 0
• 0
• 0
• 0
• 0