Psichołah, jakoha vykarystoŭvali dla dyskredytacyi Žanny Litvinoj i Biełaha lehijona, budzie vieści siamiejnuju prahramu na BT
Na telekanale «Biełaruś 2» u novym siezonie startuje adrazu niekalki siamiejnych šou.
Adno ź ich pad nazvaj «Treci lišni» budzie vieści psichaterapieŭt i hieštalt-trenier Andrej Miacielski.
«Hierojami jaho stanuć zvyčajnyja siemji, jakija sutyknulisia z prablemaj «treciaha lišniaha» u svaim domie. Na praciahu troch dzion jany vykonvajuć niaprostyja i časam całkam niezrazumiełyja im zadańni viadučaha dziela dasiahnieńnia vyniku — miru ŭ siamji», — anansuje źmiest kastryčnickaj pieradačy BiełTA.
Andrej Miacielski viadomy svaimi publikacyjami na mnohich placoŭkach ŚMI na temu hadavańnia dziaciej i seksualnych znosin. U adnym ź intervju na pytańnie žurnalista «Jak davać rady emocyjam mužčynu i žančynie» jon adkazvaŭ: «Kali žančynu «pieraklińvaje», mužčynu lepš za ŭsio padyści da jaje zzadu i mocna abniać. Patrymać tak niekalki chvilin, mocna abdymajučy i ničoha nie kažučy. Žančyna — heta enierhija, jakaja napaŭniaje mužčynu (formu). Jaje sutnaść być pamiž niebam i ziamloj, «boŭtacca». Pryziamlić jaje moža tolki mužčyna».
Ale bolš za ŭsio pytańniaŭ vyklikaŭ jaho kamientaryj nakont situacyi z rucham #MeToo. Miacielski patłumačyŭ pryčyny «seks-skandałaŭ» nastupnym čynam:
«Tam žančyny ŭsie vielmi niepryhožyja. Moža, heta sapraŭdy paradaksalnaja sproba pryciahnuć da siabie ŭvahu. Jany sprabujuć vyrvacca z «mačyzmu» i choć niejak zdabyć niejkija pravy. U nas takoha navat i blizka niama».
Akramia hetaha, u listapadzie na tym samym telekanale źjavicca realici-šou «Da pabačeńnia». U im «u adzinokich dziaŭčat źjavicca šaniec znajści svaju druhuju pałavinku. U kožnym vypusku try hieraini buduć zmahacca za prava pajści na spatkańnie z chłopcam».
Raniej Andrej Miacielski kamientavaŭ na dziaržtelebačańni spravu «Biełaha lehijona»: jon nazvaŭ lehijanieraŭ «nacystami», a paśla sprabavaŭ apraŭdacca. Taksama jon udzielničaŭ u kampramietacyi staršyni Biełaruskaj asacyjacyi žurnalistaŭ Žanny Litvinoj. Pa jaje tvaru dla BT jon sčytaŭ nastupnuju infarmacyju: «vykazvaje złość, ahidu, adrynańnie i imknieńnie schavać praŭdu».
Kamientary