Mižnarodnyja ŚMI źviarnuli ŭvahu na situacyju vakoł zvalnieńnia z telekanała «Biełsat» esememščyka Ivana Šyły. Jaho zvolnili za iraničny dopis u fejsbuku pra prezidenta Polščy Andžeja Dudu. Aficyjnaja farmuloŭka — nieadpaviednyja pavodziny ŭ dačynieńni da kalehaŭ i ŭsioj firmy. Pierad hetym u Šyły adbyłasia publičnaja pierapałka z dyrektarkaj «Biełsata» Ahnieškaj Ramašeŭskaj.
Pra situacyju z Šyłam napisała ŭpłyvovaje amierykanskaje ahienctva «Asašyejted Pres»: «Situacyja z fotazdymkami Trampa i Dudy ŭklučała zvalnieńnie reparciora telebačańnia, jakoje finansujecca dziaržavaj. Adbyłosia heta paśla taho, jak jon admoviŭsia vydalić fotazdymak sa svajoj staronki ŭ fejsbuku. Adziny kamientar, jaki jon dadaŭ da fotazdymka, byli słovy: «Źleva — prezident Polščy».
Reparcior Ivan Šyła pracavaŭ na «Biełsacie», jaki tranśluje naviny i inšyja prahramy z Polščy ŭ aŭtarytarnuju Biełaruś. Jon skazaŭ, što staŭ achviaraj «cenzury». «Biełsat» abvinavaciŭ jaho ŭ niełajalnaści i śćviardžaŭ, što publikacyja fota kampramietuje nacyjanalnuju biaśpieku Polščy, uličvajučy važnaść vajskovaha supracoŭnictva ZŠA i Polščy».
Potym hetuju publikacyju ŭ siabie na sajcie pieradrukavała viadomaja hazieta «Vašynhton Post».
Vialikuju ŭvahu hetaj situacyi nadzialajuć polskija ŚMI. Vydańnie Wprost.pl piša: «19 vieraśnia Ivan Šyła padzialiŭsia viadomym fotazdymkam Andžeja Dudy i Donalda Trampa ŭ momant padpisańnia sumiesnaj dekłaracyi. Šyła dadaŭ ad siabie, što «źleva — prezident Polščy». Praź dzień jon abviaściŭ, što «Biełsat» zaviaršyŭ supracoŭnictva ź im. Ivan Šyła paźniej apublikavaŭ vialiki post, u jakim padkreśliŭ, što ŭ čaćvier jaho zvolnili biez tłumačeńnia pryčyn. «Ciaham 11 hadoŭ asnoŭnym pryncypam našaha telekanała źjaŭlajecca supraćstajańnie polskim palityčnym kanfliktam. Tolki heta harantuje vyžyvańnie «Biełsata». I smm-ščyk byŭ zvolnieny za nievykanańnie svaich abaviazkaŭ. I, jak vy možacie bačyć ź situacyi, jakaja pačałasia paśla hetaha, jon byŭ absalutna niedastojny davieru».
Wiadomosci.wp.pl taksama nie abminuli ŭvahaj temu. «Žurnalist Ivan Šyła byŭ zvolnieny z pracy na «Biełsacie» za publikacyju fatahrafii Andžeja Dudy z Donaldam Trampam u sacyjalnych sietkach. Rašeńnie ab zvalnieńni, jak my čuli ad supracoŭnikaŭ telekanała, prymałasia Ahnieškaj Ramašeŭskaj, hałavoj «Biełsata». Pad niavinnym dopisam Šyły, jaki nie mieŭ nijakich złosnych ci niehatyŭnych kamientaroŭ, uspychnuła bura. Padklučyłasia kiraŭnictva telekanała, u tym liku Ahnieška Ramašeŭskaja, dačka lehiendarnaj Safii Ramašeŭskaj, daradcy prezidenta Dudy».
Ciapier čytajuć
Na Kipry źnik Uładzisłaŭ Baŭmhiertnier, były hiendyrektar «Urałkalija». Jaho zatrymlivali pa skandalnaj spravie ŭ Minsku1
Kamientary