42‑hadovy francuzski akcior choča eŭtanazii paśla niaŭdałaj apieracyi

Jak paviedamlaje Le Monde, 42-hadovy akcior i režysior Arno Deni pakutuje ad nievynosnych bolaŭ ź lipienia 2023 hoda, kali jamu vydalili pachvinnuju hryžu.

Heta davoli raspaŭsiudžanaja patałohija, pry jakoj častka kišečnika vychodzić praz asłablenaje miesca ŭ brušnoj ściency, utvarajučy vypukłaść u rajonie pachviny. Kab umacavać tkanki i źnizić ryzyku recydyvu, chirurhi ŭ bolšaści vypadkaŭ ustaloŭvajuć sintetyčnuju sietku-impłant — pratez, jaki fiksujecca ŭnutry cieła.

Taki mietad daŭno staŭ suśvietnym standartam. Francuzskaje tavarystva chirurhii tłumačyć, što hałoŭnaja pieravaha impłantaŭ — mienšaja vierahodnaść recydyvu. Pavodle francuzskaha nacyjanalnaha ahienctva biaśpieki lekaŭ i miedycynskich vyrabaŭ, štohod u Francyi staviać kala 200 tysiač padobnych impłantaŭ.

Dla bolšaści pacyjentaŭ heta sapraŭdy rucinnaja apieracyja, ale ŭ niekatorych ludziej mohuć uźnikać surjoznyja ŭskładnieńni. Najčaściej havorka idzie pra chraničnyja boli, jakija zdolnyja mocna pahoršyć jakaść žyćcia, pieraškodzić pracy i štodzionnym spravam. Pavodle roznych daśledavańniaŭ, takoje zdarajecca ŭ 0,5—6% vypadkaŭ. U Arno Deni hety pracent staŭ asabistaj katastrofaj.

Usiaho praź dziesiać dzion paśla apieracyi jaho stan pačaŭ rezka paharšacca. Źjavilisia mocnyja boli, młosnaść, tremar, parušeńni stravavańnia. Paźniej dadalisia prablemy harmanalnaha, myšačnaha i nieŭrałahičnaha charaktaru. Za try miesiacy jon straciŭ 17 kiłahramaŭ.

Arno pačaŭ chadzić pa daktarach, ale doŭhi čas nie moh damahčysia adkazu, što ź im adbyvajecca. Miedyki nie źviazvali jaho simptomy z apieracyjaj i impłantam, a niekatoryja navat śćviardžali, što prablema «psichałahičnaja».

Tolki praz hod adzin z chirurhaŭ vykazaŭ zdahadku, što arhanizm moža drenna pieranosić materyjał impłanta, i prapanavaŭ sietku vydalić. Nie daviarajučy ajčynnym śpiecyjalistam, akcior palacieŭ u ZŠA, dzie zapłaciŭ 40 tysiač jeŭra za apieracyju. Adnak stan jaho paśla hetaha nie palepšyŭsia, a praciahvaŭ paharšacca i akcior nieadnarazova traplaŭ u balnicy i prachodziŭ lačeńnie.

Niahledziačy na heta, Deni nie adrazu pryjšoŭ u poŭny adčaj. Naadvarot, jon pasprabavaŭ zrabić svaju historyju publičnaj i stać hołasam inšych pacyjentaŭ. U Facebook jon stvaryŭ hrupu «Francuzskija achviary hryžavych impłantaŭ», dzie sotni ludziej dzielacca padobnymi prablemami. Razam jany płanujuć padać kalektyŭny pazoŭ.

Dziakujučy ich aktyŭnaści ŭ sakaviku 2025 hoda francuzskaje ahienctva biaśpieki lekaŭ i miedycynskich vyrabaŭ uzmacniła kantrol za takimi impłantami, a ŭ červieni praviało sustreču ź lekarami i pacyjentami.

Da chvaroby Arno Deni byŭ paśpiachovym teatralnym režysioram. Na praciahu 15 hadoŭ kiravaŭ ułasnaj trupaj, pastaviŭ šerah śpiektaklaŭ, jakija byli adznačany krytykami. U 2025 hodzie jaho pastanoŭka pjesy «Niebiaśpiečnyja suviazi» Pjera Šaderło de Łakło trymała čatyry naminacyi na premiju Maljera.

U intervju žurnalistam 42‑hadovy mužčyna skazaŭ: «Ja nie mahu vychodzić z domu. U mianie niama sacyjalnaha žyćcia. Ja straciŭ usio, što robić čałavieka hodnym. I stanovicca ŭsio horš i horš. (…) Daktaram niama čaho mnie prapanavać».

Arno zajaviŭ, što pryniaŭ rašeńnie źviarnucca pa «dapamohu ŭ sychodzie» ŭ Bielhiju, dzie takaja pracedura lehalnaja. Papiaredniaja sustreča zapłanavana na kaniec studzienia.

• 5
• 0
• 0
• 4
• 15
• 55
• 0
• 0