Užo try tydni milicyja šukaje paru ź Minska, jakaja pryviezła ŭ balnicu mocna źbitaha chłopca. Jaho žyćcio vyratavać nie ŭdałosia, raspačata kryminalnaja sprava. Žurnalisty telekanała ANT adšukali dziełavoha partniora Artura Brujło, jaki raspavioŭ pra svajho kampańjona.
Pavodle jaho słoŭ, jon i Brujło razam adkryli mini-markiet. Jany paznajomilisia ŭ kałonii, dzie abodva adbyvali termin, tady im i pryjšła ŭ hałavu ideja zaniacca biznesam. Kali partnior Brujło pryjšoŭ ranicaj 30 vieraśnia ŭ kramu, jon adrazu zrazumieŭ, što niešta adbyłosia — stajała plaška vina z pabitym rylcam, na plitcy byli plamy kryvi.
Kampańjon Brujło acharaktaryzavaŭ jaho jak vielmi razumnaha čałavieka — «pakul nie vypje». Jon taksama raspavioŭ, što ŭ siamiejnych adnosinach Brujło žonka šmat u čym daminavała, i mienavita jaje ličyć aŭtaram idei źbiehčy ad śledstva.
Pierad uciokami para zabrała vyručku z kramy, a taksama noŭtbuk z buchhałtarskimi dakumientami.
Partnior Brujło miarkuje, što muž i žonka mahli schavacca ŭ Rasii. Pavodle jaho słoŭ, «takoje ŭžo było».
Raniej paviedamlałasia, što ŭ noč z 29 na 30 vieraśnia ŭ bakoŭcy kramy pa Vuzaŭskim zavułku vypivali čaćviora mužčyn. Pa viersii śledstva, 33-hadovy mužčyna ciažka źbiŭ 25-hadovaha chłopca, a potym u kampanii žonki pryvioz paciarpiełaha ŭ balnicu. U milicyi raspaviali, što ŭ chłopca byli vielmi ciažkija traŭmy. Niekalki dzion miedyki sprabavali jaho vyratavać, ale nie zdoleli.
Muža i žonku šukaje milicyja. Viadoma, što ŭ toj dzień jany źjechali na mašynie Mercedes-Benz zialonaha koleru, dziaržnumar 3444 VT-2. Jak vyśvietlili žurnalisty ANT, mašyna była nabytaja ŭ rasterminoŭku, hrošy za jaje muž i žonka poŭnaściu tak i nie vypłacili.
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»40
Kamientary