Ministerstva kultury pryniało pastanovu nakont minskaha rajona Asmałoŭka, jaki jašče niadaŭna chacieli źnieści. Dakumient apublikavany na sajcie pravo.by.
Status historyka-kulturnaj kaštoŭnaści treciaj katehoryi atrymajuć 11 budynkaŭ (na płanie — aranžavaha koleru), a 2-paviarchovaja zabudova Asmałoŭki adniesienyja da zony rehulavańnia zabudovy. Pavodle dakumienta heta aznačaje, u pryvatnaści, što tam zabaranili ŭźviadzieńnie budynkaŭ i zbudavańniaŭ.
Čytajcie taksama: Dziaržava vyrašyła nie znosić Asmałoŭku
Svaimi dumkami na hety kont padzialiŭsia z «Našaj Nivaj» adzin z aktyvistaŭ Andrej Ezieryn:
«Treba ŭsio ž udakładnić, što status historyka-kulturnaj kaštoŭnaści datyčycca tolki niekalkich damoŭ. Ale my trapili ŭ achoŭnuju zonu. Dakumient Ministerstva kultury surjozny. Jaho jašče, kaniečnie, treba vyvučać.
Ale mnie zdajecca, što heta pieramoha i śviedčańnie taho, što damokłavaha miača nad Asmałoŭkaj bolš nie budzie, — ličyć Andrej Ezieryn.
— Ciapier budziem raźvivać Asmałoŭku ŭ spakojnym režymie. Heta surjozny krok napierad. Nas pačuli. I ciapier možna havaryć pra toje, što situacyja z Asmałoŭkaj — heta dobry prykład uzajemadziejańnia hramadskaha i dziaržaŭnaha siektara. Budziem nazirać, u jaki bok budzie raźvivacca situacyja».
«Nijakaha bravurnaha zaklučeńnia, što Asmałoŭka abaronienaja, być nie moža»
Tak ličyć Juraś Mielaškievič, namieśnik staršyni Biełaruskaha tavarystva achovy pomnikaŭ historyi i kultury.
«Asmałoŭka, zhodna z pastanovaj Ministerstva kultury, usiaho tolki stała zonaj rehulavańnia zabudovy. A sami damy na mapie nie paznačanyja jak historyka-kulturnaja kaštoŭnaść.
Što heta značyć? Što na hetaj terytoryi dziejničajuć budaŭničyja rehłamienty ŭ adpaviednaści z rašeńniami Minkultu. Zabudovy mohuć znosicca, likvidavacca. I mahčymaści tak zvanych budučych inviestaraŭ heta nijak nie abmiažoŭvaje», — kaža Juraś Mielaškievič.
Terytoryja Asmałoŭki ŭ dakumiencie ŭmoŭna padzielenaja na niekalki zon. Naprykład, vytrymka z pastanovy Ministerstva kultury: «Na terytoryi zony rehulavańnia zabudovy pieršaha režymu ŭtrymańnia zabaraniajecca: uźviadzieńnie budynkaŭ i zbudavańniaŭ, nadbudova vyšej za adznaku 223 mietry ŭ Bałtyjskaj sistemie vyšyń».
Juraś Mielaškievič kamientuje: «Faktyčna heta aznačaje, što na terytoryi Asmałoŭki možna z nula budavać piacipaviarchoviki, i heta nie budzie parušać praviłaŭ rehulavanaj zabudovy. My, kaniečnie, jašče budziem vyvučać dakumient padrabiazna, ale ŭžo ciapier možna skazać, što nijakich bravurnych słovaŭ pra toje, što Asmałoŭka abaronienaja, być nie moža».
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie3
Kamientary