Sud u Ivacevičach staŭ na bok žychara rajona, jaki sudziŭsia ź milicyjanierami
Milicyjanty ŭ Ivacevičach jašče letaś zatrymali žychara rajonu Antona Ivanova i źmiaścili jaho ŭ kamieru za toje, što jon nabyŭ u adnaviaskoŭca skradzienyja instrumienty, paviedamlaje «Biełsat». Źmiaščeńnie ŭ kamieru supracoŭniki RAUS abhruntavali tym, što mužčyna brudna łajaŭsia ŭ kabiniecie milicyjantaŭ, za što na jaho skłali pratakoł ab administracyjnym pravaparušeńni. Anton Ivanoŭ nie pahadziŭsia z hetym i nakiravaŭ skarhu ŭ prakuraturu. Adbyŭsia sud, na jakim sudździa pryznaŭ žychara rajonu nievinavatym.
U sudzie suprać Antona Ivanova śviedčyli milicyjanty Ivacevickaha RAUS Arciušenia, Kikun i Kotaŭ. Milicyjanty śćviardžali, što Anton Ivanoŭ u budynku Ivacevickaha RAUS naŭmysna hučna łajaŭsia niecenzurnaj łajankaj u prysutnaści supracoŭnikaŭ milicyi, kryčaŭ, razmachvaŭ rukami, na nieadnarazovyja patrabavańni spynić supraćpraŭnyja dziejańni nie reahavaŭ, čym parušyŭ hramadski paradak i spakoj hramadzianaŭ, jakoje adlustravałasia ŭ vidavočnaj niepavazie da hramadstva, ździejśniŭ pravaparušeńnie, praduhledžanaje art. 17.1 KaAP.
«Mianie zatrymali i pasadzili na noč u kamieru. Ranicaj nastupnaha dnia prynieśli praz akienca niejkija papierki, zapatrabavali, kab padpisaŭ ich. Ja zrabiŭ hłupstva, što pastaviŭ svoj podpis. Ale paśla nočy ŭ kamiery prosta chaciełasia jak maha chutčej patrapić dadomu. Užo potym ja daviedaŭsia, što, zhodna z pratakołam, učyniŭ drobnaje chulihanstva. Što tyčycca nabyćcia skradzienych instrumientaŭ, a heta była padstava dla vykliku mianie ŭ RAUS — tak, jany byli ŭ mianie. Ale ja nie viedaŭ, što heta kradzienyja rečy. Naturalna, ja addaŭ ich», — raspavioŭ «Biełsatu» Anton Ivanoŭ akaličnaści spravy.
Paśla hetaha žychar Ivacevickaha rajona napisaŭ skarhi ŭ prakuraturu vobłaści. Pravaachoŭniki vyjavili niedakładnaści i nieadpaviednaści ŭ pratakole ivacevickich milicyjantaŭ i nakiravali spravu na pierahlad u sud. I niahledziačy na śviedčańni milicyjantaŭ, sudździa paličyŭ, što ich słovy nieabhruntavanyja i staŭ na bok žychara Ivacevickaha rajona.
Kamientary