Sacyjołahi sprahnazavali niečakany vynik vybaraŭ va Ukrainie

Kali b vybary va Ukrainie adbylisia siońnia, partyja prezidenta Uładzimira Zialenskaha «Słuha naroda» nabrała b 48% hałasoŭ. Usie inšyja partyi, jakija prachodziać u Radu, razam sabrali b tolki 36%.

Taki vialiki adryŭ partyi Zialenskaha abiacaje joj dobry vynik i ŭ mažarytarnych akruhach, dzie mnohija ŭkraincy tradycyjna hałasujuć za bahatych biznesoŭcaŭ i miascovych «mocnych haspadarnikaŭ». Mahčyma, upieršyniu ŭ najnoŭšaj historyi Ukrainy adna partyja atrymaje absalutnuju bolšaść miescaŭ u parłamiencie.

Kali sumiravać vyniki apytańniaŭ čatyroch samych aŭtarytetnych ukrainskich sacyjałahičnych słužbaŭ za červień, to atrymlivajem takuju karcinu (u pracentach ad tych, chto vyznačyŭsia, za kaho budzie hałasavać).

Słuha naroda (Zialenski) 48
Apazicyjnaja płatforma — Za žyćcio (Bojka, Miedviadčuk, Rabinovič) 12
Baćkaŭščyna (Cimašenka) 9
Jeŭrapiejskaja salidarnaść (Parašenka) 8
Hołas (Vakarčuk) 7

Trochi nižej za prachadny barjer — jon va Ukrainie składaje 5% —apynajecca partyja «Siła i čeść» eks-kiraŭnika Słužby biaśpieki Ukrainy Ihara Śmiaško.

Nie traplajuć u parłamient i nacyjanalisty (Ciahnibok, Bialecki, Jaraš), jakija paśla doŭhaha pieryjadu drableńnia znoŭ zhurtavalisia pad ściahami abjadnańnia «Svaboda».

Upali da paroha statystyčnaj pamyłki i rejtynhi partyj niaŭdałych kandydataŭ u prezidenty Hrycenki i Sadovaha, jany nazyvajucca «Hramadzianskaja pazicyja» i «Samapomač».

Adnosna ŭpaŭ i rejtynh partyi eks-prezidenta Piatra Parašenki «Jeŭrapiejskaja salidarnaść». Jana zmahajecca za toj ža elektarat, što i vybarčy śpis śpievaka Śviatasłava Vakarčuka. Da Parašenki schilajucca nacyjanał-kansiervatary, a da Vakarčuka — nacyjanał-libierały. 

Prarasijskaja «Apazicyjnaja płatforma — Za žyćcio» moža raźličvać prykładna na toj ža pracent hałasoŭ, jaki atrymaŭ jaje kandydat na prezidenckich vybarach Juryj Bojka.

Parłamienckija vybary va Ukrainie majuć adbycca 21 lipienia. Viarchoŭnaja Rada maje bolš paŭnamoctvaŭ za prezidenta.

Rasija — klučavy hulec, zdolny destabilizavać situacyju na linii frontu ŭ Danbasie, pakul vyčekvaje. Abvastreńnie abstanoŭki na linii sudakranańnia, imavierna, mabilizavała b vybarcaŭ nacyjanalistyčnych i nacyjalna-libieralnych partyj.

Uładzimir Zialenski i jaho «Słuha naroda» zajmajuć centrysckuju pazicyju va ŭkrainskim palitykumie.

* * *

Udakładnieńnie. U raniejšaj viersii artykuła «Apazicyjnaja płatforma — Za žyćcio» pamyłkova była nazvanaja jak «Apazicyjny błok».

• 0
• 0
• 0
• 0
• 0
• 0
• 0
• 0