Administracyja Trampa časova prypyniła dziejańnie bolšaści zaćvierdžanych Kanhresam fondaŭ zamiežnaj dapamohi ŭ čakańni jaje revizii Dziarždepartamientam i Ahienctvam ZŠA pa mižnarodnym raźvićci, piša radyjo «Svaboda» sa spasyłkaj na CNN.
List adpaviednaha źmiestu ŭpraŭleńnie nakiravała Dziarždepartamentu i Ahienctvu ZŠA pa mižnarodnym raźvićci (USAID) 3 žniŭnia. Viedamstvam daručana pravieści pravierku, kolki hrošaj ciapier znachodzicca na hetych rachunkach i jak jany raschodujucca.
Suma finansavańnia, pra jakuju idzie havorka, — ad 2 da 4 miljardaŭ dalaraŭ, paviedamiŭ pradstaŭnik USAID. Hrošy mohuć być vykarystanyja tolki praz try pracoŭnyja dni paśla zakančeńnia pravierki, jakaja, jak adznačaje telekanał, moža być adkładzienaja. Adnak srodki treba vydatkavać da 30 vieraśnia, kali ŭ ZŠA skončycca finansavy hod ZŠA, inakš termin dziejańnia dazvołu na ich minaje.
Administracyjna-biudžetnaje ŭpraŭleńnie Biełaha doma moža prapanavać Kanhresu admianić vydzialeńnie hrošaj, praduhledžanych da kanca finansavaha hodu. Heta zaležyć ad reakcyi Dziarždepartamentu i USAID na zvarot.
Krytyki aścierahajucca, što hety krok moža pryvieści da rezkaha skaračeńnia finansavańnia hlabalnych prahram achovy zdaroŭja, miratvorčaści, kantrolu nad narkotykami i inšych vidaŭ dapamohi, niahledziačy na toje, što vyłučeńnie hetych hrošaj ŭchvaliŭ Kanhres.
Administracyja Trampa nieadnarazova sprabavała źmienšyć kolkaść hrošaj, jakija Vašynhton tracić na zamiežnuju dapamohu. U krasaviku 2019 hodu administracyja biespaśpiachova sprabavała skaracić biudžet na źniešniuju dapamohu i dyplamatyju na 23%.
Ciapier čytajuć
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»44
Kamientary