U Minskim aeraporcie ŭ niadzielu, 29 vieraśnia, z 4:22 nie było elektryčnaści. Rejsy zatrymanyja, usie sistemy aeraporta nie pracavali, ludzi čakajuć u budynku svaich vyletaŭ. Pa stanie na 9:18, nie vylecieła svoječasova 8 rejsaŭ, piša TUT.BY.
Što kažuć pasažyry?
— Infarmacyi niama nijakaj, nikomu ničoha nie kažuć, kampjutary nie pracujuć, raźmietka nie pracuje, kasy i stojki rehistracyi taksama. Dzieci śpiać na padłozie. Administracyja na suviaź nie vychodzić, ludziam nie prapanavali ničoha — ni vady, ni ježy. Niekalki chvilin tamu pa hučnaj suviazi abviaścili pažarnuju tryvohu i terminovuju evakuacyju. Ludzi stajać u aeraporcie, nikoha tak i nie evakuiravali, — paviedamiła TUT.BY Volha, jana ŭ aeraporcie z 6-j ranicy.
— Ludzi prosiać vady i ježy ŭ rabotnikaŭ aeraporta. Kupić ničoha nielha. Kasy nie pracujuć, — paviedamlaje Hanna Kryłova. Pavodle jaje, vady potym usio ž pasažyram prynieśli. Paźniej, kaža pasažyrka, paabiacali haračaje charčavańnie dzieciam.
— Znachodzimsia ŭ samalocie rejsam Aerafłota na Šaramiećcieva, ŭźlot nie dazvalajuć. Pasažyry stykovačnych rejsaŭ vielmi niervujucca, — paviedamlaŭ pasažyr Dźmitryj.
Miarkujučy pa tabło vyletaŭ aeraporta, pa stanie na 8:45 jašče byli zatrymanyja niekalki rejsaŭ, užo ŭ 09:00 pasadka na ŭsie była zavieršana.
Što kažuć enierhietyki?
Jak paviedamiŭ TUT.BY pradstaŭnik «Biełenierha» Alaksandr Malkoŭ, prablema na baku aeraporta — enierhietyki spraŭna zabiaśpiečvajuć elektraenierhijaj miascovuju padstancyju.
— Ranicaj 29 vieraśnia ažyćciaŭlałasia nadziejnaje źniešniaje elektrazabieśpiačeńnie Nacyjanalnaha aeraporta. Vysakavoltnyja linii 110 kV i abstalavańnie padstancyi «Aeraport», jakija naležać RUP «Minskenierha», pracavali biez zbojaŭ. Adklučeńni elektraenierhii ŭ Nacyjanalnym aeraporcie źviazanyja z techničnymi niepaładkami na enierhietyčnym abstalavańni, jakoje naležyć Nacyjanalnamu aeraportu.
Rabotniki RUP «Minskenierha» akazali nieabchodnuju techničnuju dapamohu śpiecyjalistam enierhasłužby Nacyjanalnaha aeraporta dla chutčejšaha adnaŭleńnia nadziejnaha enierhazabieśpiačeńnia spažyŭcoŭ, padłučanych da siekcyj 10 kV padstancyi «Aeraport».
Što kaža aeraport?
— Zafiksavanyja zboi ŭ padačy elektraenierhii. Administracyja aeraporta prosić prabačeńnia za časovyja niazručnaści pry rehistracyi. Pravodziacca ŭsie nieabchodnyja raboty i mierapryjemstvy, skiravanyja na bolš chutkaje adnaŭleńnie padačy elektraenierhii, — paviedamiła TUT.BY pres-sakratar aeraporta Ramina Samatchanava.
Pavodle jaje, kala 8:20 ranicy padača elektraenierhii adnoŭlena.
— Likvidavany pieraboi ŭ padačy elektraenierhii. Aeraport pierajšoŭ na pracu ŭ štatnym režymie.
Pa słovach pradstaŭnika aeraporta, u budynku aeravakzała pa patrabavańni pasažyram davali pitnuju vadu, taksama aeraport arhanizavaŭ dadatkovyja miescy dla taho, kab pasažyry mahli sieści.
U takich situacyjach aeraport nie pavinien prapanoŭvać pasažyram haračaje charčavańnie — tolki achaładžalnyja napoi.
Pažarnaja tryvoha z patrabavańniem evakuacyi, tłumačyć Ramina Samatchanava, spracoŭvała z pryčyny pierabojaŭ u sietcy — uzharańnia ŭ budynku aeravakzała nie było.
U aeraporcie škadujuć, što abjavy napałochali pasažyraŭ, i zapeŭnivajuć, što, kali b nieabchodnaść była realnaj, rabota ŭsich słužbaŭ była skiravana b na biaśpieku pasažyraŭ.
— Zaraz aeraport robić usio mahčymaje, kab paskoryć adnaŭleńnie pracy ŭ štatnym režymie ŭsich nieabchodnych apieracyj: rehistracyi, apracoŭki bahažu i inšych, — paviedamiła Raminua Samatchanava.
Pavodle jaje, pa stanie na 9:18, nie vylecieła svoječasova 8 rejsaŭ. Z prylotam prablem nie było — samaloty prymalisia pa raskładzie.
Pryčyna adklučeńnia pakul nieviadomaja, pracujuć śpiecyjalisty.
Kamientary