«Źbirajem pazły z 42 000 detalaŭ, inšyja niecikavyja». Siamja biełarusaŭ pryniała ŭdzieł u čempijanacie śvietu pa źbirańni pazłaŭ
U minułyja vychadnyja ŭ Ispanii prajšoŭ pieršy čempijanat śvietu pa źbirańni pazłaŭ. U im pryniali ŭdzieł biełarusy — minčanie Raman Vałyniec i Julija Kim.
Raman i Julija pracujuć u IT. Źbirać pazły pačali hadoŭ ź dziesiać tamu.
«Vypadkova trapili ŭ internecie na forum amataraŭ pazłaŭ, jaki stvaryŭ chłopiec z Tahanroha. Stali siabravać, dzialicca pośpiechami. Tak atrymałasia, što amataraŭ pazłaŭ stała vielmi šmat, vyrašyli pravieści spabornictvy. Hady dva tamu ŭbačyli, što ŭ Bielhii źbirajecca vialiki forum, taki pazł-marafon, dzie treba ciaham 24 hadzin bieź pierapynkaŭ źbirać pazły. Ty zakančvaješ adzin, tabie padajuć druhi. My pajechali tudy i pieramahli. Adny z samych aktyŭnych udzielnikaŭ byli ispancy. Jany jašče tady kazali, što marać pravieści ŭ siabie suśvietny čempijanat», — raspaviadaje Raman Vałyniec.
Sioleta, u apošnija vychadnyja vieraśnia, pazł, jak kažuć, skłaŭsia. Na čempijanat, jaki adbyŭsia ŭ ispanskim horadzie Valjadalid, sabralisia pradstaŭniki 40 krain.
Spabornictvy prachodzili ŭ troch katehoryjach: adzinočnaj, parnaj i kamandnaj.
U adzinočnym spabornictvy Jula zaniała 72 miesca sa 198 udzielnikaŭ, Raman staŭ 132. U parnych spabornictvach biełarusy stali 69-mi.
«U adzinočnaj i parnaj katehoryi patrabavałasia sabrać za hadzinu pazł z 500 detalaŭ, jaki raniej nie źbiraŭsia, a ŭ kamandnaj — adrazu čatyry pazły (2 — na 1 000 kavałačkaŭ, 2 — na 1 500). Maksimalny čas taksama byŭ abmiežavany. Svoj pazł treba było sabrać za 2 hadziny, a kamandny za 8 hadzin. Kali chtości nie paśpiavaŭ skłaści pazł całkam, to žury ličyła kavałački, jakija zastalisia», —raskazvaje Raman.
Vynik biełarusy pakazali nievysoki, Raman Vałyniec patłumačyŭ, što źbirać pazły — heta zusim nie dziciačaja zabava.
«U kožnaha, kali tak možna skazać spartsmiena, svaja taktyka. Ja, naprykład, spačatku źbiraju ramku, paśla sprabuju zhrupiravać kavałački pazłaŭ pa elemientach, paśla vykładvaju plamkami. Niekatoryja robiać pa-inšamu. Akazałasia, što chtości ciamić chutčej», — śmiajecca Raman.
Jon raskazvaje, što pazły jon i žonka źbirajuć pastajanna. «U asnoŭnym my ich zamaŭlajem. I zamaŭlajem tyja, u jakich bolš za 10 tysiač detalaŭ. Zaraz, naprykład, źbirajem pazł na 42 000 detalaŭ. Jaho pamier 2ch7 mietraŭ. Siužety lublu roznyja, i pryrodu, i kocikaŭ», — pryznajecca Raman Vałyniec.
Što ž adbyvajecca z užo sabranym pazłam?
«Jon razburajecca i prybirajecca nazad u skryniu. Niekatoryja pracy my raniej afarmlali ŭ ramki i viešali na ścieny, a ciapier, kali stali źbirać vialikija pazły, dzie ž takich ścien nabiareš? Tamu fatahrafujem hatovuju pracu i raźbirajem jaje», — adkazaŭ Raman.
-
U Bierazinie pračnulisia pčoły. Dziaŭčynka, jakaja ich pabačyła, skaryła tyktok
-
«Biełarusy i ŭ Dubai biełarusy». Jak suajčyńniki arhanizavali dapamohu tym, chto nie moža viarnucca damoŭ praz zakrytaje nieba
-
«Pad kaniec adpačynku daviedalisia, što tut niama schoviščaŭ». Biełarusy, što znachodziacca ŭ AAE, raskazali, jak im tam ciapier
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii12
Kamientary