Marzaluk: Ułada vykarystała saviecki resurs. Čakajucca važnyja kanstytucyjnyja źmieny
Deputat Pałaty pradstaŭnikoŭ Ihar Marzaluk raspavioŭ pra isnavańnie 17 ekśpiertnych prapanoŭ pa ŭdaskanaleńni Kanstytucyi. Pra heta jon zajaviŭ padčas sustrečy z vybarščykami ŭ siaredniaj škole №40 Mahilova 5 listapada, paviedamlaje mspringonline, jaki pryvioŭ aŭdyjozapis vystupu palityka, jaki pramaŭlaŭ pa-biełarusku.
Ihar Marzaluk bałatujecca ŭ Pałatu pradstaŭnikoŭ pa Mahiloŭska-Leninskaj akruzie № 84.
«A ciapier samaje važnaje — čym budzie zajmacca novy parłamient i čym ja budu zajmacca, kali vy mnie akažacie davier.
My jašče nie adčuvajem, što znachodzimsia na złomie epoch. Biełaruś za 25 hadoŭ prajšła vielmi vialiki, składany, ciažki i absalutna nieadnaznačny šlach. Razam z tym my zachavali dziaržavu z usimi jaje atrybutami. My zdoleli nie pravalicca. (…) Ale my vykarystali toj resurs, u tym liku, skažam tak, resurs saviecki», — zaznačyŭ jon.
«Tamu važniejšaja zadača dla parłamienta, dla tych, chto pryjdzie, — heta praca nad novym varyjantam Kanstytucyi, nad novaj madellu palityčnaj sistemy. Jasna, što ŭsio heta budzie prachodzić praz refierendum. Jasna, što ŭsio heta budzie prachodzić z ulikam mierkavańnia absalutnaj bolšaści hramadzian», — patłumačyŭ jon.
«U cełym źmianiłasia hramadstva. Nastaŭniki, viadoma, heta adčuvajuć. Tak, u svaich aŭdytoryjach jany adčuvajuć heta vielmi istotna. Niekalki dziasiatkaŭ tysiač źjaviłasia tolki dalaravych, lehalnych miljanieraŭ. Tolki ŭ adnym Minsku. Źmianiłasia struktura hramadstva. Masa ludziej, jakija zajmajucca małym i siarednim biznesam.
Razumnaja dziaržava, razumiejučy źmianieńnie struktury, razumieje, što nieabchodna mianiać i palityčnuju sistemu, mianiać Kanstytucyju, u tym liku. Z ulikam hetych niuansaŭ», — zaznačyŭ Ihar Marzaluk.
«Jość na siońniašni dzień 17 roznych ekśpiertnych prapanoŭ nakont Kanstytucyi. …
Samyja važnyja kanstytucyjnyja źmieny — heta pieraraźmierkavańnie ŭładnych funkcyj, heta bolš ułady parłamientu, jaki budzie kantralavać premjer-ministra i ŭrad u cełym, heta administracyjna-terytaryjalnaja reforma, reforma miascovaha samakiravańnia. Mienavita biełaruskaja ŭłada, jakuju abvinavačvajuć va ŭsich hrachach, absalutna asensavana budzie iści na vialikuju libieralizacyju, bolšuju svabodu ŭ hetym kirunku. Dla nas samaje hałoŭnaje - zachavać biełaruskuju dziaržaŭnaść, zrabić Biełaruś całkam lehitymnaj, adekvatnaj krainaj u śviecie, pryznanaj usimi», — zaklučyŭ Marzaluk.
U hety ž dzień jon pravioŭ jašče adnu sustreču z vybarščykami — u siaredniaj škole № 35. Tam paćvierdziŭ svaje słovy nakont źmieny Kanstytucyi i zajaviŭ, što hetyja parłamienckija vybary — «apošnija pa mažarytarnaj sistemie», dadaje msping.online.
Paźniej Ihar Marzaluk u kamientary NN udakładniŭ, što razmova išła mienavita pra 17 ekśpiertnych prapanoŭ pa ŭdaskanaleńni Kanstytucyi. «Siońnia nichto nie viedaje, jak kančatkovy varyjant budzie vyhladać. Anons mahčymych źmienaŭ ahučyŭ prezident. Ja kazaŭ ab mahčymych źmienach, ale nie pra napisanyja novyja kanstytucyi. U parłamiencie nijakich prajektaŭ niama, bo ich nichto nie ŭnosiŭ», — dadaŭ jon.
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary