Łukašenka: Futbalisty i chakieisty hrošy atrymlivajuć, a krainu tolki hańbiać
Spartyŭnyja abjekty nie prynosiać vialikich hrošaj, ale pavinny choć by akuplacca. Pra heta kiraŭnik Biełarusi, prezident Nacyjanalnaha alimpijskaha kamiteta Alaksandr Łukašenka zajaviŭ siońnia na Alimpijskim schodzie NAK, pieradaje BIEŁTA.
Kiraŭnik dziaržavy źviarnuŭ uvahu, što spartyŭnyja abjekty niasuć vialikuju sacyjalnuju nahruzku, bo atlety tam trenirujucca biaspłatna, za dziaržaŭny košt. Časta ŭtrymlivać takija abjekty zatratna. Łukašenka ličyć, što nieabchodna pryniać miery, kab zrabić spartyŭnyja placoŭki akupnymi. «Vialikich hrošaj tut nie zarobiš, ale akuplacca jany pavinny, asabliva ŭ takich vidach, jak tenis», — pierakanany jon.
Na dumku Alaksandra Łukašenki, paśpiachovym spartsmienam, jakija dabilisia vyšyń i zarabili hrošaj, taksama treba ŭnosić ŭkład u raźvićcio biełaruskaha sportu i dapamahać inšym atletam. Naprykład, kuplać invientar — tyja ž rakietki ŭ Pałac tenisa.
«Kali čałaviek vychodzić na vysoki ŭzrovień, jon pavinien niejak udzielničać u dalejšym raźvićci sportu ŭ krainie. Takich vidaŭ dastatkova: i futbalisty, i chakieisty, jakija pakul tolki hrošy atrymlivajuć, a krainu hańbiać», — zajaviŭ kiraŭnik dziaržavy.
Łukašenka na schodzie źviarnuŭ uvahu ŭsiaho kiraŭnictva alimpijskaha kamiteta na toje, što «ŭłasnaść NAK — heta śviatoje». Za stan spartyŭnych abjektaŭ adkazvaje i ministr sportu, adznačyŭ Alaksandr Łukašenka. «Zadača numar adzin ministru — śviata bierahčy dziaržaŭnuju ŭłasnaść, jakaja pieradajecca ŭ rasparadžeńnie spartsmienaŭ, dzie jany mohuć treniravacca i pakazvać vysokija vyniki. Pra heta ja jaho ŭžo papiaredziŭ. Toje ž samaje i ŭ NAKu pavinna być», — padkreśliŭ jon.
Kamientary