Dastupna i karotka tłumačym, što adbyłosia siońnia ŭ Rasii i što da hetaha Biełarusi

Padsumavali toje, što adbyłosia ŭ Rasii 15 studzienia.

Pavialičyć

Rankam kiraŭnik Rasii Uładzimir Pucin vystupiŭ pierad Fiederalnym schodam. U cełym heta dastatkova rytualnaja štuka, jakaja adbyvajecca štohod. Ale na hety raz prapanovy ad Pucina akazalisia etapnyja.

Pra što ž skazaŭ prezident Rasii? Samaje istotna — heta tranśfier ułady. Dla biełarusaŭ heta važna praz toje, što mnohim bačyŭsia taki scenar, kali Rasija i Biełaruś abjadnoŭvajucca ŭ adnu krainu, i tady Pucin zmoža zachavać svaju ŭładu dalej, uznačaliŭšy «Sajuznuju dziaržavu». Navat kali hety varyjant i abmiarkoŭvaŭsia, to prapanavany byŭ zusim inšy. Biełarusy ŭ dadzienym pytańni mohuć uzdychnuć z palohkaj. Padobna da taho, što anšlus Biełarusi nie padajecca Pucinu lohkaj zadačaj. Ni Biełaruś, ni Łukašenku prezident inšaj sajuznaj dziaržavy nie zhadaŭ ni razu.

Uvohule, Pucin prapanavaŭ istotna abmiežavać prezidenckuju ŭładu, źmienšyć termin znachodžańnia prezidenta na pasadzie dvuma terminami (nie zapar, a ŭvohule), pašyryć rolu premjer-ministra, a taksama parłamienta (jon budzie zaćviardžać premjera i jahony ŭrad).

Ale klučavoje miesca ŭ prajekcie tranśfieru ŭłady budzie zajmać Dziaržaŭnaja rada Rasii. Što heta takoje? Na siońnia heta małaŭpłyvovy daradčy orhan pry prezidencie, jaki maje kansultacyjny charaktar. Mała chto ŭvohule viedaje pra jaho isnavańnie. Dziaržrada nie maje kanstytucyjnaha charaktaru. Ciapier ža prapanoŭvajecca zamacavać status hetaha orhana.

Na siońnia Dziaržaŭnuju radu ŭznačalvaje sam Uładzimir Pucin. Mnohija vykazvajuć zdahadku, što jon ža budzie ŭznačalvać hety instytut i paśla 2024 hoda (kaniec prezidenckaha terminu) pry novym kiraŭniku krainy. To-bok farmalna prezidentam budzie inšy čałaviek, ale ŭłada budzie praciahvać znachodzicca ŭ rukach Pucina. Niešta padobnaje ŭ krasaviku letaś užo adbyłosia ŭ Kazachstanie.

Na hetym źmieny ŭ Rasii nie spynilisia. Paśla abiedu ŭrad Dźmitryja Miadźviedzieva ŭ poŭnym składzie padaŭ u adstaŭku. Heta značyć, što ŭ Rasii budzie novy premjer-ministr. Samoha Miadźviedzieva pryznačyli namieśnikam sakratara Rady biaśpieki. Heta panižeńnie, ale nie takoje ŭžo i istotnaje. 

Pakul niezrazumieła, chto stanie novym rasijskim premjeram. Nazyvajuć mera Maskvy Siarhieja Sabianina i staršyniu Padlikovaj pałaty Alaksieja Kudryna, ale heta prosta kandydaty, jakich viečna nazyvajuć. Premjeram moža stać zusim niečakany čałaviek. Jak i niezrazumieła, ci budzie hety čałaviek pierajemnikam Pucina ŭ pierśpiektyvie.

U suchoj astačy što z hetaha dla Biełarusi? Vyhladaje, što ŭ śviatle apošnich padziej uvaha da našaj krainy z boku Kramla budzie źnižanaja. Nie varta spadziavacca, što novy ŭrad stanie mienš cyničnym adnosna Biełarusi, čym miadźviedzieŭski. Naadvarot, varta čakać jašče bolšaha prahmatyzmu z rasijskaha boku, tamu małavierahodna, što stanie praściej. Zrešty, mnohija daŭno i chacieli mienavita takoha charaktaru adnosin z Maskvoj: nijakaha braterstva, tolki biznes.

• 0
• 0
• 0
• 0
• 0
• 0
• 0
• 0