Vitaŭtas Łandśbierhis: Chaj Biełaruś vyrašyć, chto jana — «zialony čałaviečak» ci niezaležnaja dziaržava
Pieršy kiraŭnik niezaležnaj Litvy Vitaŭtas Łandśbierhis u intervju «Svabodzie» zajaviŭ, što kali Biełaruś choča być sapraŭdy niezaležnaj dziaržavaj, to pavinna admovicca ad AES, jakuju jon nazyvaje «całkam kramloŭskim prajektam», piša «Radyjo Svaboda».
«Biełaruś robić nam śvinstva. Kala samaj našaj miažy. Hetaja miaža ŭ vypadku avaryi nie spynić radyjanuklidaŭ, jany pojduć u naš bok. Tamu my stvaryli hety Ruch, kab nas pačuli biełarusy. Heta nie antybiełaruski ruch, my žadajem roskvitu i pośpiechaŭ našym susiedziam. My raźličvajem na toje, što Biełaruś narešcie pračniecca i zahavoryć sama», — skazaŭ Łandśbierhis.
U niadzielu litoŭski palityk pryniaŭ udzieł u pieršym źjeździe Ruchu suprać Biełaruskaj AES. Jaho stvaryli litoŭskija kansiervatary, libierały i hramadskija dziejačy. Na pieršym źjeździe, jaki adbyŭsia ŭ niadzielu, pierad prysutnymi vystupili i biełaruskija apazicyjaniery: Anatol Labiedźka, Źmicier Kučuk i Pavieł Sieviaryniec. Praz telefon udzielnikaŭ pryvitała Śviatłana Aleksijevič. Ruch pazicyjanuje siabie jak arhanizacyju šyrokaha śpiektru palityčnych siłaŭ, jakaja budzie damahacca zakryćcia stancyi ŭ Astraŭcy.
«Heta pytańnie voli Biełarusi. Ci maje jana niejkaje prava hołasu? Jana pavinna sama vyrašyć, kim jana choča być — niezaležnaj krainaj ci kałonijaj. Chaj Biełaruś narešcie vyrašyć, chto jana — «zialony čałaviečak» ci niezaležnaja dziaržava. Jana pavinna pramović svaim jazykom, čaho jana choča. Spadar Łukašenka pavinien vyrašyć, ci jon samastojny lidar, ci padparadkoŭvajecca carku ŭ Maskvie».
Schod praihnaravała Litoŭskaja sacyjał-demakratyčnaja partyja. Jana śćviardžaje, što heta vyklučna palityčny prajekt kanservataraŭ pad vybary. Łandśbierhis mocna raskrytykavaŭ palitykaŭ levaha kryła.
«Pra palityčnaje vykarystańnie hetaha pytańnia kažuć tyja, chto ničoha inšaha nie moža, akramia jak lapać jazykom. Sacyjał-demakraty ničoha nie zmahli zrabić suprać budaŭnictva BiełAES. Ich pieramovy ź Mienskam vynikaŭ nie dajuć, bo inicyjatar AES siadzić nie ŭ Minsku, a ŭ Maskvie. Hety inicyjatar sprabuje navat raźbić salidarnaść bałtyjskich krain u hetym pytańni, sprabujučy padkupić palitykaŭ», — ličyć Vitaŭtas Łandśbierhis.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja113
Kamientary