«SB» nie zaŭvažaje Capkału, zatoje močyć Babaryku

Vyłučeńnie ŭ prezidenty bankira Viktara Babaryki i eks-dyrektara Parka vysokich technałohij Valeryja Capkały stała niečakanaściu dla palityčnych analitykaŭ.

Ci varta ich ličyć realnymi apanientami Alaksandra Łukašenki?

Adzin z aryjenciraŭ — adsačyć staŭleńnie dziaržaŭnaj presy da hetych alternatyŭnych kandydataŭ.

Pošuk na sajcie «Sovietskoj Biełoruśsii» nie pakazvaje nivodnaj naviny, u jakoj by zhadvaŭsia Valeryj Capkała. Heta zvykłaja praktyka dziaržaŭnych ŚMI — prosta ihnaravać tych ci inšych asobaŭ.

Situacyja ź Viktaram Babarykam inšaja. Paśla taho, jak jon abvieściŭ pra svaju inicyjatyvu, kałumnisty «Sovietskoj Biełoruśsii» pryśviacili jamu dva mierkavańni.

12 maja vyjšła sproba «rasśledavańnia» taho, kamu naležyć kraŭdfandynhavaja płatforma MolaMola, zasnavalnikam jakoj hramadstva ličyć Eduarda Babaryku. Heta syn Viktara Babaryki i kiraŭnik jaho inicyjatyŭnaj hrupy.

Vyśvietliłasia, što płatforma naležyć TAA «Chajv Prodžekt». Jano, u svaju čarhu, naležyć łatvijskamu «MVS Inviestmient», jakoje znachodzicca pad kantrolem hramadzian Łatvii Alaksieja Ściapanava i Alaksandra Rastova. Pra što heta śviedčyć? Ni pra što, pryznaje aŭtar «SB». Prosta chaciełasia padzialicca infarmacyjaj, što tam adbyvajecca niešta nibyta zakonnaje, a nasamreč dziŭnaje.

Praz dva dni najlepšy analityk Biełarusi Andrej Mukavozčyk vyrašyŭ pierahledzieć «Tok» ź Viktaram Babarykam, jaki ŭpieršyniu źjaviŭsia na «Našaj Nivie» ŭ śniežni 2019 hoda.

A paśla zabłytana i namiokami vykazać u svajoj kałoncy asnoŭny pasył: maŭlaŭ, Babaryka idzie ŭ prezidenty, kab pradać Biełaruś.

«My pabudavali nie samastojnuju ekanomiku, a dziaržavu-parazit», — ličyć čałaviek, vidavočna, žadajučy stać supier-parazitam. Navošta? Svaju pieradvybarčuju płatformu pa zrazumiełych pryčynach jon pakul nie apublikuje. Ale šmatlikija važnyja słovy byłoj słupkovaj dvarankaj (zakreślena) užo skazanyja: «Prychodzić čas, i nadychodzić hadzina raspłaty. Apošniaje «familnaje srebra» — dziaržava Biełaruś — staić na vitrynie. Pryśpieŭ čas…»

Nie padobny ŭžo Viktar Babaryka da kiraŭnika banka. Nie padobny jašče i da dziejača bolš maštabnaha ŭzroŭniu. I navat da miecenata-dabratvorca nie vielmi padobny. A bolš za ŭsio nahadvaje nieznajomaha sudovaha prystava, jaki pryjšoŭ vykanać čužuju volu pa apisvańni majomaści, jakaja spadabałasia jamu. Abapirajučysia na tych durniaŭ, što tak časta i tak achvotna brali ŭ jaho šmatsłoŭnyja intervju», — padsumoŭvaje Mukavozčyk.

• 0
• 0
• 0
• 0
• 0
• 0
• 0
• 0