Minzdaroŭja nie adkazvała na pytańni žurnalistaŭ z 17 krasavika

Apošni raz bryfinh u Ministerstvie adbyŭsia 24 krasavika.

Tady namieśnica ministra Alena Bohdan začytała padrychtavanuju infarmacyju i admoviłasia adkazvać na pytańni karespandentaŭ. Heta taksama byŭ adziny dzień, kali pradstaŭnica Minzdaroŭja pryniesła spačuvańni siemjam pamierłych ad epidemii.

Pierad tym pres-kanfierencyja adbyłasia 17 krasavika z udziełam ministra achovy zdaroŭja Uładzimira Karanika. Padčas jaje ministr i jaho kalehi prykładna 45 chvilin vystupali z ustupnymi słovami, paśla čaho kala 10 chvilin adkazali na niekalki pytańniaŭ žurnalistaŭ — pry hetym vybirali sami, chto moža zadać pytańni.

Taja pres-kanfierencyja skončyłasia pratestami. Syn pamierłaha ŭ Barysavie fielčara źvinavaciŭ ministra ŭ chłuśni nakont jaho baćki. Ministr zajaviŭ, što ŭ pryčynie śmierci hetaha miedrabotnika jašče treba razabracca, na što syn prademanstravaŭ paśviedčańnie ab śmierci taty z paznačanym u im COVID-19.

Čytajcie taksama: «Kaho vy sprabujecie padmanuć? Što za končanaja dziaržava?» Syn pamierłaha fielčara pakazaŭ Karaniku paśviedčańnie ab śmierci taty

Akramia taho, žurnalisty vyjavili, što nazvanyja ministram Karanikam ličby chvorych pa rajonach Viciebskaj vobłaści ŭ razy razychodziacca z kolkaściu, abvieščanaj u toj ža dzień miascovymi ŭładami.

U bolšaści jeŭrapiejskich krain u čas pandemii ŭpaŭnavažanyja asoby sanitarnych słužbaŭ štodzionna infarmavali hramadskaść pra situacyju. U mnohich krainach kiraŭniki viedamstva rabili heta asabista. Statystyka, u tym liku pa rajonach, nie składaje ŭ inšych jeŭrapiejskich krainach tajamnicy.

Pa aficyjnych źviestkach, pa stanie na 15 maja ŭ Biełarusi zafiksavana bolš za 27 tysiač vypadkaŭ karanavirusa. 

Miarkujučy pa toj infarmacyi, jakuju my źbirajem na miescach, najhoršaja situacyja skłałasia ŭ Viciebskaj vobłaści, Minsku, Stoŭbcach (Minskaja vobłaść), Łunincy (Bresckaja vobłaść). U inšych rehijonach vyłučajucca Homiel, Buda-Kašalova (Homielskaja vobłaść), Barysaŭ (Minskaja vobłaść). U Hrodzienskaj vobłaści tryvožnyja viestki prychodziać z Navahrudka.

Jak možna zrabić vysnovu, supastaŭlajučy najaŭnyja źviestki, u mnohich rehijonach kolkaść pnieŭmanij u šmat razoŭ pieravyšaje jak zvyčajnyja dla hetaha siezona pakazčyki, tak i aficyjna zarehistravanuju kolkaść vypadkaŭ karanavirusa.

Apošnija aficyjnyja źviestki pra zahružanaść balnic i kolkaść špitalizavanych pacyjentaŭ ź pnieŭmanijaj prahučali 2 maja — tady ich było 12 800. Usie nastupnyja dni kolkaść vyjaŭlenych vypadkaŭ karanavirusa pieravyšała kolkaść vylečanych chvorych. 

• 0
• 0
• 0
• 0
• 0
• 0
• 0
• 0