Biełarusy razam ź Lavonam Volskim zaśpiavali ŭ anłajnie «Pavietrany šar»
«O'kiej! Tut usio o'kiej! Tolki dychać mnie z kožnym dniom ciažej»
Biełarusy z roznych haradoŭ i krain razam u anłajnie zajhrali i zaśpiavali pieśniu hurta N.R.M. «Pavietrany šar»: https://youtu.be/NzcPh6aVt_Q.
Hramadskaja kampanija «Hodna» razam z muzykam Sieržukom Doŭhušavym, lidaram hurta Vuraj i stvaralnikam inicyjatyvy «Śpieŭny schod», zapuściła štotydniovy muzyčny prajekt «Śpiavajem Hodna».
Sens jaho: źbirać u anłajn-farmacie biełarusaŭ z roznych kutkoŭ śvietu i śpiavać viadomyja i znakavyja biełaruskija pieśni razam ź ich aŭtarami i vykanaŭcami.
U zapisie pieśni «Pavietrany šar» paŭdzielničali Lavon Volski, viadomyja opiernyja śpievaki Marharyta Laŭčuk i Pavieł Kaciušyn, muzyki hurtoŭ Vuraj i Dee Tree, paleski narodny kalektyŭ «Kalažanki» i inšyja biełarusy, jakija žyvuć u roznych haradach Biełarusi i śvietu.
Tydzień tamu, 1 červienia, byŭ prezientavany pieršy rolik «Śpiavajem Hodna», u jakim biełarusy razam sa Źmitrom Vajciuškievičam śpiavali pieśniu «Ja naradziŭsia tut»: https://youtu.be/1v_nXJCW2Kk.
U zapisie novych piesień moža paŭdzielničać kožny achvotny, dla hetaha treba dałučycca da telehram-kanała i čata «Hodna»: https://t.me/hodnaby.
Tam Siaržuk Doŭhušaŭ budzie publikavać anonsy i instrukcyi pa novych pieśniach, a taksama davać parady, jak pravilna śpiavać i hrać, kab Jaŭhienu Ciarenćjevu, jaki ŭ prajekcie adkazny za vytvorčaść videa i huku, było praściej usio heta zvodzić u adzin rolik.
U płanach prajekta «Śpiavajem Hodna» zaprašać viadomych biełaruskich muzykaŭ i štotydniova vypuskać novyja roliki. Kali vam spadabaŭsia pieršy vypusk, to na MolaMola možna padtrymać prajekt, kab jon staŭ rehularnym: https://molamola.by/cmp/7NG.
A kali skončycca pandemija karanavirusa, to arhanizatary prajekta chočuć sabrać jaho ŭdzielnikaŭ i hledačoŭ, kab užo ŭ žyvym farmacie narešcie razam zaśpiavać hučna i hodna.
Padrabiaźniej pra kampaniju «Hodna»: https://hodna.by/.
Kamientary