Paśla zatrymańnia siabra hrupy Cichanoŭskaj źnikli 1500 podpisaŭ
Aleha Babroŭskaha ź inicyjatyŭnaj hrupy Śviatłany Cichanoŭskaj zatrymali kala Kamaroŭskaha rynku ŭ Miensku ranicaj 7 červienia za parkoŭku ŭ zabaronienym miescy.
U niadzielu 7 červienia na placoŭcy pierad Kamaroŭskim rynkam u Miensku pavinien byŭ prajści vialiki pikiet pa zbory podpisaŭ za vyłučeńnie Śviatłany Cichanoŭskaj u jakaści kandydatki na vybarach prezydenta Biełarusi. Jak raskazali Svabodzie siabry inicyjatyŭnaj hrupy Cichanoŭskaj, ranicaj 7 červienia pierad pačatkam zboru podpisaŭ la Kamaroŭki byŭ zatrymany ich paplečnik Aleh Babroŭski.
Pryčynaj zatrymańnia stała toje, što jon zaparkavaŭ aŭtamabil u zabaronienym miescy. Babroŭskaha źvieźli ŭ nieviadomym kirunku supracoŭniki milicyi. Pravaachoŭniki zabrali i aŭtamabil Babroŭskaha, u jakim byŭ ryštunak dla zboru podpisaŭ, a taksama padpisnyja listy, jak čystyja, tak i zapoŭnienyja.
Jak skazali Svabodzie siabry inicyjatyŭnaj hrupy Śviatłany Cichanoŭskaj, sud nad Aleham Babroŭskim adbyŭsia 8 červienia. Aktyvista pryznali vinavatym u niepavazie da sudu i prysudzili jamu 20 sutak aryštu, a taksama štraf.
«Sabranyja podpisy nam nie viarnuli, — skazała Svabodzie siabroŭka inicyjatyŭnaj hrupy Śviatłany Cichanoŭskaj Maryja Maroz. — Aŭtamabil Aleha taksama nie addali».
Pa stanie na 9 červienia za kratami znachodziacca bolš za dziesiać siabroŭ inicyjatyŭnaj hrupy Śviatłany Cichanoŭskaj. Častka ź ich, u tym liku kiraŭnik inicyjatyŭnaj hrupy Siarhiej Cichanoŭski, abvinavačvajucca pa 342 artykule Kryminalnaha kodeksu — arhanizacyja i padrychtoŭka dziejańniaŭ, jakija hruba parušajuć hramadzki paradak.
Kamientary