«Čytaju brud u sacsietkach». Što kažuć dyrektary rasijskich artystaŭ, jakija mieli pryjechać u Biełaruś 8 žniŭnia
Litaralna za paru dzion da vybaraŭ adrazu ŭ niekalkich haradach Biełarusi abviaścili šerah kancertaŭ z zorkami rasijskaj i ŭkrainskaj pop-muzyki, amierykanskimi repierami i miascovymi vykanaŭcami. Vystupy projduć 8 žniŭnia. U Biełarusi čakajuć repiera Tyga, śpievakoŭ Lepsa, Ahucina, Praśniakova, hurty «Dyskateka Avaryja» i «Kar Men», Morandi i Boney M.
Ale ž niezrazumiełyja niekatoryja momanty. Pa-pieršaje, vystupy niekatorych vykanaŭcaŭ anansavanyja adrazu ŭ dvuch haradach. Ci paśpiejuć?
Pa-druhoje, a jak buduć dabiracca rasijskija pop-zorki? Rasijskija miežy zakrytyja ž.
Taksama cikava, što ŭ afišach vykanaŭcaŭ hastroli raśpisanyja až da nastupnaha leta. Ale vystupaŭ u Biełarusi 8 žniŭnia ŭ hrafikach niama — to-bok, rašeńnie sapraŭdy prymałasia imkliva.
I bolšaść dyrektaroŭ ci mieniedžaraŭ rasijskich vykanaŭcaŭ nie adkazvaje na pytańni žurnalistaŭ, ci adkazvaje vielmi nieachvotna.
Pres-sakratarka Leanida Ahucina adkazała tolki, što «artysty prylaciać», za padrabiaznaściami adpraviła da kancertnaha dyrektara Taćciany Łarynaj. Łaryna zajmajecca vystupami jak Ahucina, tak i Uładzimira Praśniakova i maładoj śpiavački Eliny Čahi. Vystup usich traich čakajuć u Hrodnie.
Ale Łaryna tak i nie źniała słuchaŭku.
Kancertny dyrektar hurta «Kar Men» Alaksandr Šovikaŭ adkazaŭ jašče bolš tumanna:
«Ja viedaju, što ŭ vas paŭsiul afišy, ale ja pakul sumniajusia, ci hurt pajedzie vystupać. Ja nie vyrašyŭ. Kali možna daviedacca, ci pryjedzie? Na kancert prychodźcie ci sačycie za našym instahramam. A vy sami chočacie, kab pryjechaŭ hurt? Vam biez roźnicy? Navošta tady zvanić, kali vam niama roźnicy?»
Nie vielmi nastrojenyja na dyjałoh i inšyja dyrektary.
«U vas jość miascovyja arhanizatary, da ich i źviartajciesia. Ja pakul ničoha nie viedaju.
Ja ŭsio razumieju, čytaju, jakoje haŭno i brud ljecca ŭ sacsietkach i nie chaču ničoha kamientavać. Ja nie viedaju, što ŭ vas tam adbyvajecca, tamu prosta kali pakličuć nas śpieć pieśni — my pryjedziem i praśpiavajem»,
— raspavioŭ kancertny dyrektar hurta «Fabryka», jaki maje vystupić u Viciebsku, paśla čaho kinuŭ słuchaŭku.
Kancertnaja dyrektarka śpievaka Alaksandra Panajotava kinuła słuchaŭku, ledź pačuŭšy pytańnie pra kancert 8 žniŭnia.
Kancertny dyrektar hurta «Dyskateka Avaryja» adpraviŭ z usimi pytańniami da pijarščycy, źviazacca ź jakoj niemahčyma.
Kamientary