Nacbank abmiežavaŭ prodaž valuty na BVFB

Pieršy dzień čarhovaha pracoŭnaha tydnia pačaŭsia z paniki na ŭnutranym valutnym rynku. Biełaruskija banki, jak dziaržaŭnyja, tak i kamiercyjnyja, admovilisia prymać u svaich klijentaŭ zajaŭki na kuplu zamiežnaj valuty dla apłaty impartnych kantraktaŭ.

Pryčym, pramova nie idzie ab avansavych płaciažach. Asobnyja dziaržaŭnyja banki adpraŭlajuć svaich klijentaŭ da miascovych uładaŭ abo ŭ Ministerstva pramysłovaści dla ŭzhadnieńnia zajavak na kuplu valuty.

U bankaŭskich kruhach paćvierdzili, što čutki paŭstali nie na pustym miescy. Pavodle ich słovaŭ, siońnia ranicaj Nacbank RB, spasyłajučysia na zakrytuju pastanovu Saŭminu i NB RB №388 ad 30 sakavika 2009 hodu, nie zarehistravanuju ŭ Nacyjanalnym rejestry pravavych dakumientaŭ, vusna zabaraniŭ prodaž valuty na BVFB da 1 červienia, za vyklučeńniem apłaty miedpreparataŭ.

Bankam rekamiendavana zadavalniać zajaŭki klijentaŭ na pazabiržavym rynku. Reakcyja rynka była imhniennaj – kurs na mižbanku syšoŭ na ŭzrovień kursu NBRB +4%, adnak bankiram nahadali ab isnavańni inšaj rekamiendacyi Nacbanku – kurs na pazabiržavym rynku nie pavinien pieravyšać uzrovień «aficyjny kurs NBRB + 2%», paviedamlaje afn.by.

Situacyja nahadvaje lohkuju paniku i ŭsie čakajuć niejkaha lista Nacbanku z tłumačeńniem dalejšaj palityki kursaŭtvareńnia va ŭmovach lohkaj paniki na rynku.

Atrymała raspaŭjudžańnie zajava namieśnika ministra finansaŭ Piatra Žabka pra toje, što biełaruski ŭrad nie bačyć patreby ŭ dalejšym zamiežnym nadzvyčajnym finansavańni dla pieraadoleńnia ekanamičnaha kryzisu, pakul popyt na jeŭrapiejskim i rasijskim rynkach zastajecca stabilnym.

Kali administracyja Łukašenki pojdzie na množnaść valutnych kursaŭ — a abmiežavańnie prodažu valuty na BVFB viadzie mienavita da hetaha — tady adbudziecca sukrytaje padzieńnie kursu rubla, jak u kancy 90-ch, i praz heta źnizicca impart. U hetym vypadku kraina sapraŭdy zmoža abyścisia biez dadatkovych kredytaŭ. U advarotnym vypadku, pry ciapierašnich abjomach ekspartu i impartu, ciažka sabie ŭjavić, jak urad stočyć kancy z kancami biez dadatkovych zapazyčvańniaŭ.

Pres-sakratar — načalnik upraŭleńnia infarmacyi hałoŭnaha banka krainy Anatol Drazdoŭ zavieryŭ, što Nacbank novych abmiežavańniaŭ na kuplu valuty nie ŭvodziŭ: «Nijakich pastanovaŭ pa pryčynie abmiežavańniaŭ prodažu valuty na biržy ci pazabiržavym rynku Nacyjanalny bank nie prymaŭ. Listoŭ padobnaha źmiestu hałoŭny bank krainy bankam taksama nie rassyłaŭ», — padkreśliŭ Drazdoŭ. Tym nie mienš, siońnia abjom tarhoŭ na BVFB akazaŭsia niezvyčajna mały: było pradadziena ŭsiaho 8 młn dalaraŭ, što mienš za zvyčajny dla paniadziełka abjom.

• 0
• 0
• 0
• 0
• 0
• 0
• 0
• 0