Dniami zapracujuć sankcyi suprać biełaruskich biznesmienaŭ. Ale niekatorym udałosia vyjści z-pad udaru
Mierkavanyja sankcyi suprać biełaruskich biznesmienaŭ i jurydyčnych asobaŭ, datyčnych da supracoŭnictva z režymam Alaksandra Łukašenki, majuć być ahučanyja i pryniatyja litaralna dniami — nazyvajecca data 17 śniežnia.
Ale nie ŭsio tak prosta. Dyj data niapeŭnaja — mahčymy varyjant, što ich pryniaćcie zaciahniecca jašče na miesiac.
Sankcyjnyja śpisy rychtavalisia ŭ abstanoŭcy strohaj sakretnaści jeŭrapiejskimi słužbami, rola biełaruskich dziejačaŭ była ŭ miežach «akreślivańnia kirunkaŭ».
Viadoma, što šyrokamasštabnaha ekanamičnaha cisku nie budzie, razmovy pra adklučeńnie bankaŭskaj sistemy SWIFT — tolki razmovy.
Błakavańnie SWIFT pakul nie hatovaja padtrymać nivodnaja kraina-siabar Jeŭrasajuza.
Na prykładzie inšych precedentaŭ, u pryvatnaści, Irana, zachodniki zrazumieli, što pryviadzieńnie krainy da stanu humanitarnaj katastrofy niasie ryzyki dla Jeŭrasajuza. Asabliva adčuvalna heta moža być, kali ŭvodzić sankcyi suprać dziaržavy la samych miežaŭ sajuza.
Poŭny śpis jurydyčnych i pryvatnych asobaŭ, jakija majuć trapić pad sankcyi, u publičnaj prastory nie publikavaŭsia.
U pieršapačatkovaj viersii ŭ jaho mahli trapić kala 70 čałaviek z afilavanymi biznesami, u vynikovaj viersii ich nibyta zastaniecca tolki kala 30 — niekatorym udałosia prybrać siabie z-pad sankcyj.
Krynicy «Našaj Nivy» śćviardžajuć, što niekatorym biznesoŭcam udałosia davieści jeŭrapiejcam, što jany ŭ hetym śpisie lišnija.
Pavodle niepravieranych čutak, Alaksandr Mašenski, naprykład, moh by być u śpisie, ale, nibyta, davioŭ uładam Isłandyi — krainie, adkul impartuje rybu na sotni miljonaŭ dalaraŭ, — što ŭdar pa jaho biznesie budzie aznačać kankretnyja straty dla Isłandyi. A kiraŭnictva toj krainy nibyta pryniała jaho pazicyju i paŭpłyvała na rašeńnie Jeŭrasajuza.
My źviazalisia z ułaśnikam «Santa-Bremar». Jak pryznaŭsia Mašenski karespandentu «Našaj Nivy», jon viedaje, što jaho proźvišča sapraŭdy było ŭ pieršapačatkovym sankcyjnym śpisie. Ale jon kaža, što takuju traktoŭku varta ličyć niepraŭdzivaj, bo zachodniki najpierš razhladajuć uniosak asob i biźniesaŭ u letnija padziei, da jakich jon nie maje nijakaha dačynieńnia.
«Ale słovy ab arhumientach pra abjomy ekspartu ryby — heta kazki! Ja dumaju, što ŭ tych, chto składaje hetyja śpisy, jość peŭnyja kryteryi ŭklučeńnia. Napeŭna, karektna stavić pytańnie ab tym, ci adpaviadaje «Santa-Bremar» hetym kryteryjam? Moža, my rasstrelvali demanstrantaŭ? Moža, my — «kašalki», — u terminałohii aŭtaraŭ? Ja nie dumaju. Ja dumaju, što jany prymajuć rašeńni nie na padstavie infarmacyi, chto kolki ryby ekspartuje, a na padstavie inšych kryteryjaŭ, jakim «Santa-Bremar» nie adpaviadaje», — skazaŭ Mašenski.
Pry hetym jon paćvierdziŭ, što peŭnyja zachady ab vyklučeńni kampanii sa śpisaŭ im prymalisia, ale jakija kankretna, tłumačyć nie staŭ. U ahulnych rysach jon nazvaŭ heta tłumačeńniem
Kali ŭjavić, što raskazanaja nam schiema praŭdzivaja, to pa takim ža pryncypie mahli dziejničać i inšyja biznesmieny, vyvodziačy svaje aktyvy z-pad mahčymaha ŭdaru.
Taksama pakul nieviadomy los «Akta ab demakratyi, pravach čałavieka i suvierenitecie», jaki mieŭsia pryniać Sienat ZŠA. Sprava ŭ tym, što da Novaha hoda pryniać jaho nie paśpiavajuć, bo kanhresmeny sychodziać na kaladnyja vakacyi. Dalej zaćvierdžańnie moža zaciahnucca praź pierachodny pieryjad, źviazany ź pieradačaj ułady ŭ ZŠA da Džo Bajdena.
Vynik pasiadžeńnia ŭ Sienacie budzie zaležyć ad paŭnaty infarmacyi pa biełaruskim kiejsie i ad taho, nakolki jany buduć hatovyja kiravacca rekamiendacyjami.
Taksama pakul niama peŭnaści z sustrečaj Śviatłany Cichanoŭskaj i Bajdena.
Palityčnyja praciŭniki demakrataŭ u ZŠA źviartajuć uvahu, što da ŭstupleńnia prezidenta na pasadu jahony štab nie moža mieć zamiežnapalityčnych kantaktaŭ, tamu, maŭlaŭ, jak možna anansavać takija sustrečy? Asabliva paśla skandałaŭ z savietnikam pa nacyjanalnaj biaśpiecy Majkłam Flinam, jaki pierad ustupleńniem na pasadu Donaldam Trampam sustreŭsia z rasijskim pasłom u Vašynhtonie.
Viadoma, što nie było takich anonsaŭ i z boku amierykancaŭ — tolki interpretacyi žurnalistaŭ, ale ŭ peŭnym sensie takija farmuloŭki naškodzili mierkavanaj sustrečy.
Kamientary