Pamior eks-namieśnik kiraŭnika Administracyi prezidenta Michaił Sazonaŭ
5 studzienia pajšoŭ z žyćcia eks-namieśnik kiraŭnika Administracyi prezidenta Michaił Sazonaŭ, pra heta Tut.by raspaviała jahonaja žonka Raisa Daškievič. Michaił Jurjevič uvachodziŭ u skład kamandy Alaksandra Łukašenki, kali toj upieršyniu ŭdzielničaŭ u prezidenckich vybarach u 1994 hodzie.
Michaiłu Sazonavu było 64 hady. Apošni čas jon mocna chvareŭ.
— Dva miesiacy jon pravioŭ u kardyjacentry. Loh jon z sercam, tam zaraziŭsia jašče karanavirusam, — raspaviała Raisa Daškievič.
Michaił Sazonaŭ skončyŭ hieahrafičny fakultet BDU. Pracavaŭ hieołaham u navukova-daśledčych i inžynierna-daśledčych arhanizacyjach. U 1980-ch pierajšoŭ u MUS. Zajmaŭsia baraćboj z ekanamičnaj złačynnaściu i karupcyjaj. Pracujučy ŭ milicyi, atrymaŭ jurydyčnuju adukacyju. Udzielničaŭ u likvidacyi avaryi na ČAES.
U 1993 hodzie z pasady namieśnika načalnika Respublikanskaha ŭpraŭleńnia pa baraćbie z ekanamičnaj złačynnaściu byŭ nakiravany ŭ parłamienckuju antykarupcyjnuju kamisiju, jakuju ŭznačalvaŭ Alaksandr Łukašenka. Padčas pieradvybarnaj kampanii, kali abirali pieršaha prezidenta Biełarusi, byŭ adnym z kiraŭnikoŭ štaba ŭ kamandzie Łukašenki.
Z 1994 hoda Sazonaŭ pracavaŭ u Administracyi prezidenta. Byŭ namieśnikam i pieršym namieśnikam kiraŭnika.
Z 1999 hoda pa 2000 hod, znachodziačysia na pasadzie pamočnika prezidenta, udzielničaŭ u padrychtoŭcy dahavora ab stvareńni Sajuznaj dziaržavy.
U 2000 hodzie syšoŭ u adstaŭku ź dziaržaŭnaj słužby i zaniaŭsia biznesam.
Raźvitańnie ź Michaiłam Sazonavym projdzie siońnia, 8 studzienia, pa adrasie: Minsk, vuł. Kulman, 33 z 12.00 da 14.00.
Kamientary