Aŭstralija i Francyja abaviažuć Google i Facebook dzialicca dachodami z nacyjanalnymi ŚMI
Urad Aŭstralii ŭvodzić pieršy ŭ śviecie zakon, jaki abaviazvaje bujnyja infarmacyjna-technałahičnyja kampanii, takija jak Google i Facebook, płacić ŚMI za publikacyju spasyłak na ich materyjały na svaich płatformach.
U adkaz na hety zakon amierykanskaja kampanija Google pahražaje pazbavić Aŭstraliju dostupu da pošukavika i niekatorych inšych servisaŭ. Premjer-ministr Aŭstralii Skot Morysan zajaviŭ, što takija pahrozy nie paŭpłyvajuć na rašeńnie zakanadaŭcaŭ, paviedamlaje BBC.
Zakon, jaki prapanuje Aŭstralija, — prykład taho, jak dziaržava moža mieć upłyŭ na bujnyja infarmacyjna-technałahičnyja kampanii, a taksama pavialičvać kaštoŭnaść navinnaha kantentu ŭ krainie.
Hałoŭny dyrektar Google Australia Mieł Silva na słuchańniach Sienata zajaviła, što taki zakon ažyćciavić niemahčyma. «Kali zakon ustupić u siłu, u nas nie budzie inšaha vybaru, akramia jak abmiežavać u Aŭstralii dostup da pošukavaj sistemy Google», — śćviardžaje jana.
Zakanadaŭcy abvinavacili amierykanskuju kampaniju ŭ šantažy i zapałochvańni ŭ suviazi z mahčymym uviadzieńniem reformy.
Dla čaho Aŭstralija ŭvodzić taki zakon?
Google — najbolš papularnaja ŭ Aŭstralii pošukavaja sistema, jakaja amal nie maje kankurentaŭ. Urad śćviardžaje, što kolkaść karystalnikaŭ Google ŭzrastaje za košt čytačoŭ navinnych sajtaŭ, tamu budzie spraviadliva, kali kampanija pačnie spłačvać peŭnuju sumu ŚMI za ich pracu.
Akramia hetaha, urad pierakonvaje, što aŭstralijskim ŚMI nieabchodna finansavaja padtrymka, bo jany źjaŭlajucca asnovaj dla funkcyjanavańnia demakratyi ŭ dziaržavie.
Čamu Google nie padtrymlivaje hetu inicyjatyvu?
Pradstaŭniki Google pierakonvajuć, što kampanija choča finansava padtrymlivać miascovuju žurnalistyku, ale prapanavany Aŭstralijaj zakon moža parušyć ich biznes-madel, asabliva kali inšyja krainy voźmuć prykład i pačnuć uvodzić takuju ž reformu.
Taksama Mieł Silva śćviardžaje, što zakon supiarečyć svabodnamu abmienu infarmacyjaj u internecie i budzie mieć niespryjalnyja nastupstvy dla ličbavaj ekanomiki kampanii, kali joj pryjdziecca płacić za spasyłki i vyniki pošuku.
Takoj ža pazicyi prytrymlivajucca kiraŭniki sacyjalnaj sietki Facebook, jakija śćviardžajuć, što kampanija nie atrymlivaje kamiercyjnaj vyhady ad raźmiaščeńnia navin na svajoj płatformie. Zatoje sajty ŚMI pavialičvajuć kolkaść čytačoŭ, dziakujučy takim bujnym płatformam.
Jakuju reakcyju vyklikała heta navina?
Aŭstralijcy ŭ sacyjalnych sietkach razyšlisia ŭ svaich mierkavańniach. Niekatorych cikavić pytańnie, ci buduć paśla adklučeńnia pošukavaj sistemy pracavać takija servisy, jak Gmail, Google Maps i Google Home, na što kampanija pakul nie daje adnaznačnaha adkazu.
Nie tolki Aŭstralija, ale i jeŭrapiejskija krainy na praciahu apošnich hadoŭ sprabavali pravieści padobnuju reformu. Kali ŭ 2014 hodzie Ispanija abaviazała Google płacić za spasyłki na sajty ispanskich ŚMI, kampanija zakryła dostup da Google News u Ispanii.
A voś pieramovy Francyi i Google, jakija raspačalisia niekalki dzion tamu, skončylisia paśpiachova dla ŭrada. Usio dziakujučy Dyrektyvie ES ab aŭtarskim pravie, pryniataj u 2019 hodzie, jakuju Francyja pieraniesła ŭ svajo zakanadaŭstva. U vyniku pieramoŭ Google ciapier abaviazvajecca ŭstaloŭvać pahadnieńni z francuzskimi ŚMI, zhodna ź jakimi kampanija budzie vypłočvać peŭnuju sumu za vykarystańnie aŭtarskich materyjałaŭ žurnalistaŭ. Imavierna, što pa takoj ža madeli ŭ chutkim časie buduć dziejničać i inšyja jeŭrapiejskija krainy.
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie6
Kamientary