Cisk sankcyj ES i ZŠA, što ŭzmacniajecca, prymusić Alaksandra Łukašenku syści, ličyć Śviatłana Cichanoŭskaja. «Vyrašalnaja bitva» z režymam u Biełarusi adbudziecca hetaj viasnoj, miarkuje i Pavieł Łatuška, piša DW.
Alaksandr Łukašenka budzie vymušany syści ŭ najbližejšyja miesiacy. Takoje mierkavańnie vykazała lidar biełaruskaj apazicyi Śviatłana Cichanoŭskaja ŭ intervju niamieckamu štotydnioviku Bild am Sonntag, apublikavanym u niadzielu, 28 lutaha. Na dumku Cichanoŭskaj, da adstaŭki Łukašenki niepaźbiežna pryviadzie cisk na jaho režym z boku ES i ZŠA.
«Cisk budzie raści z kožnym dniom i adnojčy stanie dla Łukašenki praźmiernym, tamu jon sydzie», — zajaviła Cichanoŭskaja. «Režym Łukašenki padzie jašče sioleta. Dumaju, viasnoj jon sydzie», — dadała palityk.
U svaju čarhu, były ministr kultury Biełarusi, člen Prezidyuma Kaardynacyjnaha savieta apazicyi Pavieł Łatuška, jaki vosieńniu 2020 hoda byŭ vymušany źjechać u Polšču, zaklikaje Zachad damahacca poŭnaj ekanamičnaj izalacyi Biełarusi. «My hatovyja vynosić sankcyi šeść ci dvanaccać miesiacaŭ, kali paśla hetaha situacyja palepšycca», — adznačyŭ apazicyjanier u hutarcy z žurnalistami niamieckaj štotydniovaj haziety Welt am Sonntag.
Z punktu hledžańnia Łatuški, Jeŭrasajuzu nieabchodna prypynić usie ekanamičnyja ŭzajemaadnosiny ź Biełaruśsiu, kab aparat režymu Łukašenki nie moh bolš «zdabyvać srodki na mižnarodnych finansavych rynkach». Pry hetym apazicyjanier, hetak ža, jak i Śviatłana Cichanoŭskaja, vykazaŭ upeŭnienaść u tym, što «vyrašalnaja bitva» pamiž pratestoŭcami i ciapierašniaj uładaj razyhrajecca ŭžo viasnoj.
Kamientary