«Mianie pałochaje, što ludzi žyvuć u strachu»: maładoj maci dali dva hady chatniaj chimii za akcyi na pierachodzie ŭ padtrymku palitviaźniaŭ

Sudździa Viktoryja Šabunia pakarała jaje 2 hadami chatniaj chimii — mienavita takoje pakarańnie zaprasiŭ prakuror Cimafiej Ničyparuk, piša spring96.org.

Pavodle viersii abvinavačvańnia, Julija Jakubovič u śniežni 2020 hoda i studzieni 2021 hoda ŭ Minsku na vulicy Ramanaŭskaja Słabada «ŭ miežach niesankcyjanavanaj akcyi sumiesna ź inšymi asobami ŭdzielničała ŭ pierakryćci prajeznaj častki darohi i błakavańni ruchu transpartu». Pry hetym abvinavačanaja publična vykrykvała łozunhi, ździajśniała vopleski rukami, vykarystała ściahi i transparanty. 

«Dziejańni Jakubovič paciahnuli parušeńnie hrafika i maršrutu ruchu pasažyrskaha, kamiercyjnaha i hramadskaha transpartu, u tym liku aŭtobusaŭ i tralejbusaŭ KUP «Minsktrans», — havorycca ŭ abvinavačvańni. «Minsktrans» škody nie naličyŭ

Na druhim pasiadžeńni prakuror vystaviŭ novaje abvinavačvańnie. Julija abvinavačvałasia ŭ parušeńni pracy hramadskaha transpartu, a mienavita aŭtobusa №40 i tralejbusa №9. Chacia z materyjałaŭ spravy vynikaje, što tralejbus stajaŭ na Ramanaŭskaj Słabadzie kala 40 siekund, a aŭtobus prajechaŭ bieź pieraškod.

Julija raspaviała, što 20 śniežnia vyjšła na vulicu i ŭbačyła ludziej, jakija vyjšli padtrymać palitviaźniaŭ. Spačatku sustreła piać čałaviek, potym sabrałasia čałaviek 20-30. Dalej pajšli da pierachodu pa Ramanaŭskaj Słabadzie, 14. Pierajšli darohu na zialony sihnał śviatłafora, potym nie zaŭvažyła, jakoje śviatło było na śviatłafory. Darohu pierajšła davoli chutka, nie abaročvałasia. Mašyny stajali na darozie, nichto z kiroŭcaŭ nie vykazvaŭ niezadavolenaść. Hramadski transpart nie bačyła.

3 studzienia vyjšła z doma z metaj prahulacca. Nakiravałasia ŭ bok kinateatra «Biełaruś». Sustreła znajomuju. Jana skazała, što budzie akcyja. Julija vyrašyła zastacca pahladzieć. Ubačyła 20-30 čałaviek. Nijakich ukazańniaŭ ni ad kaho nie pastupała. Ściaha ŭ jaje nie było, ale potym nieznajomy čałaviek daŭ joj maleńki ściah. Kali vyjšli na prajeznuju častku, znachodzilisia padčas zialonaha sihnała i adnaho čyrvonaha. Paśla zakančeńnia adrazu nakiravałasia dadomu. Kali sychodziła, nie bačyła, ci zastalisia ludzi na prajeznaj častcy, bo nie abaročvałasia.

22 krasavika jana vystupiła z apošnim słovam:

«Ja chacieła b adznačyć taki momant, što paśla zatrymańnia mnie HUBAZiK, śledstva i moj pieršy advakat pastajanna paŭtarali adzin i toj ža tezis: «Vy ž maci, treba siadzieć doma i vychoŭvać dzicia». Mnie ščyra kažučy, absalutna niezrazumieła, što jany majuć na ŭvazie pad vychavańniem, tamu što mnohija, dumaju, čuli taki tezis: «Vychavańnie dziciaci — heta, u pieršuju čarhu, vychavańnie siabie». I jak možna vychoŭvać dziaciej sumlennymi, kali darosłyja kažuć, što drenna, a potym vychodziać u darosłaje žyćcio i zajmajucca tym, što ahavorvajuć inšych ludziej abo vykarystoŭvajuć zakony ŭ svaich niejkich intaresach.

Jak možna vychoŭvać čałavieka dobrym, čałavieka z empatyjaj, spačuvajučym čałaviekam, kali pry hetym my budziem ihnaravać, što ludzi siadziać u turmach, ludzi hublajuć svajo zdaroŭje, chtości hublaje svajo žyćcio. Mnie zdajecca, što čałaviek — heta nie jaho zasłuhi ŭ minułym, niejkija tam płany, mety, budučynia. U pieršuju čarhu, heta naš vybar tut i ciapier, kožnuju siekundu i chvilinu. I rabić hety vybar treba ź lubovi da svaich dziaciej, da siabie, a nie praz strach.

Mianie pałochaje, što ŭ Biełarusi ludzi žyvuć u strachu. Tamu što z-za strachu jany prymajuć rašeńni: z-za strachu za svajo žyćcio, svajho dabrabytu. Ja baču supracoŭnikaŭ milicyi, jakija prymajuć rašeńni nie samastojna, a tamu što im źvierchu zahadvajuć. I heta na roznych uzroŭniach. Heta vielmi strašna. Ja chacieła by, kab nikomu z tut prysutnych takich rašeńniaŭ prymać nie davodziłasia».

• 0
• 0
• 0
• 0
• 0
• 0
• 0
• 0