Za raspaŭsiudžvańnie filmaŭ i muzyki Paŭdniovaj Karei ŭ KNDR ciapier pahražaje śmiarotnaje pakarańnie.
Kim Čen Yn nazvaŭ kiej-pop, jaki maje prychilnikaŭ va ŭsim śviecie, «złajakasnaj puchlinaj», jakaja razbeščvaje maładych žycharoŭ Paŭnočnaj Karei. A dziaržaŭnyja ŚMI pišuć pra toje, što paŭdniovakarejskaja kultury pahražaje dziaržaŭnaj biaśpiecy KNDR.
Paŭnočnakarejskaja dziaržaŭnaja prapahanda daŭno apisvaje Paŭdniovuju Kareju jak piekła, dzie žyvuć adny žabraki. Adnak hety vobraz razburajuć karejskija filmy, jakija traplajuć u Paŭnočnuju Kareju kantrabandaj, dzie pakazvajecca zusim inšaja realnaść.
U apošni čas ułady KNDR publična zajaŭlajuć pra «antysacyjalistyčny» ŭpłyŭ paŭdniovakarejskich filmaŭ, muzyki i klipaŭ, piša The New York Times.
U śniežni 2020 hoda ŭ Paŭnočnaj Karei ŭzmacnili zakony suprać tych, chto słuchaje muzyku, hladzić filmy i čytaje knihi z Paŭdniovaj Karei. Pakarańnie pavialičyli ź piaci da 15 hadoŭ pracoŭnych łahieraŭ. A tym, chto raspaŭsiudžvaje takija materyjały, pahražaje navat śmiarotnaje pakarańnie. Niadaŭna paŭdniovakarejskaje vydańnie Daily NK pisała, što žychara KNDR pakarali śmierciu za nielehalny prodaž dyskaŭ i fłešak z paŭdniovakarejskimi videa.
Taksama novyja zakony praduhledžvajuć dva hady pakarańnia ŭ pracoŭnych łahierach dla tych, chto «razmaŭlaje, piša ci śpiavaje ŭ paŭdniovakarejskim styli».
Kim Čen Yn nieadnarazova vykazvaŭsia nakont raspaŭsiudžvańnia paŭdniovakarejskaj kultury ŭ KNDR. «Dla jaho kulturnaje ŭvarvańnie z Paŭdniovaj Karei vyjšła za miežy dapuščalnaha», — adznačaje Dzyro Išymaru, redaktar japonskaha vydańnia Asia Press International, jakoje piša pra KNDR.
Pa infarmacyi Asia Press International, kampjutary, telefony i muzyčnyja płejery maładych paŭnočnakarejcaŭ pačali praviarać na najaŭnaść kantentu z Paŭdniovaj Karei.
«Ekanamičnaje stanovišča Paŭnočnaj Karei najhoršaje z taho času, jak Kim Čen Yn pryjšoŭ da ŭłady dziesiać hadoŭ tamu. Jamu prychodzicca ŭzmacniać kantrol, kab strymlivać sacyjalnyja chvalavańni», — śćviaržaje Dzyro Išymaru.
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»40
Kamientary