Indyjski štam karanavirusa: što viadoma navukoŭcam

Indyjski štam, viadomy jak B. 1.617.2, ličycca najbolš zaraznym. Niekatoryja ekśpierty śćviardžajuć, što delta-varyjant moža być prykładna na 50% bolš zarazny, čym brytanski štam (alfa-varyjant), piša The New York Times.

Delta-varyjant byŭ vyjaŭleny ŭ kastryčniku 2020 hoda ŭ indyjskim štacie Macharaštra. Z taho času štam raspaŭsiudziŭsia nie tolki pa ŭsioj Indyi, ale i pa ŭsim śviecie.

Peŭnyja źviestki śviedčać pra toje, što varyjant moža častkova ŭchilacca ad antycieł, jakija vypracoŭvajucca arhanizmam paśla pieraniesienaha karanavirusa ci vakcynacyi. Tamu hety varyjant moža zrabić mietady lačeńnia manakłanalnymi antyciełami mienš efiektyŭnymi.

Delta-varyjant maje adrazu niekalki mutacyj, u tym liku ŭ šypavidnym białku. Hetyja źmieny dazvalajuć virusu chutčej traplać u kletki arhanizma čałavieka i ŭchilacca ad niekatorych imunnych reakcyj.

Akramia delty, taksama isnuje varyjant «delta-plus». Jon jašče bolš zarazny i ŭstojlivy da vakcyn, ale pakul «delta-plus» nie paśpieŭ šyroka raspaŭsiudzicca.

Niadaŭniaje šatłandskaje daśledavańnie pakazała, što ludzi, infikavanyja delta-varyjantam, prykładna ŭ dva razy čaściej traplajuć u balnicu, čym ludzi, infikavanyja brytanskim štamam. Adnak niapeŭnaść zastajecca, śćviardžajuć navukoŭcy.

«Vierahodnaść bolš ciažkaj chvaroby paśla zaražeńnia indyjskim štamam — adzinaje pytańnie, na jakoje niama dakładnaha adkazu», — śćviardžaje Majkł Asterchołm, amierykanski epidemijołah i dyrektar Centra daśledavańniaŭ infiekcyjnych zachvorvańniaŭ va Univiersitecie Miniesoty.

Pa źviestkach Public Health England, u Vialikabrytanii ŭ vyniku zaražeńnia delta-varyjantam pamierli ludzi, jakija ŭžo byli vakcynavanyja ad karanavirusa. Siem čałaviek pamierli praz 21 dzień paśla pieršaj pryščepki, jašče 12 — na praciahu dvuch tydniaŭ paśla druhoj.

Delta-varyjant zarehistravany ŭžo ŭ 80 krainach. Heta najbolš raspaŭsiudžany varyjant u Indyi i Vialikabrytanii, dzie na jaho prychodzicca bolš za 90 adsotkaŭ vypadkaŭ. U ZŠA kožny piaty vypadak zaražeńnia — indyjski štam.

Na dumku ekśpiertaŭ, małavierahodna, što delta-varyjant budzie ŭjaŭlać vialikuju ryzyku dla całkam vakcynavanych ludziej. «Całkam vakcynavanym ludziam heta novaja faza pandemii nie pahražaje, — adznačaje Piter Chotez, dekan Miedycynskaha kaledža Biejłora. — Adnak achova, jakuju zabiaśpiečvaja adna doza, nizkaja, tamu ryzyka zarazicca bolš vysokaja».

Simptomy delta-varyjanta padobnyja da mocnaj prastudy. U admysłovaj prahramie Zoe brytancy, infikavanyja indyjskim štamam, skardzilisia na hałaŭny bol, piaršeńnie ŭ horle, nasmark, tempieraturu i časam kašal.

• 0
• 0
• 0
• 0
• 0
• 0
• 0
• 0