Były prezident ZŠA Donald Tramp pravioŭ pieršy mitynh svaich prychilnikaŭ paśla sychodu z pasady ŭ studzieni 2021 hoda. Jon abrynuŭsia z žorstkaj krytykaj na mihracyjnuju palityku Džo Bajdena.
Mitynh, jaki prachodziŭ pad łozunham «Vyratujem Amieryku», adbyŭsia ŭ horadzie Vielinhtan, štat Ahajo. Tramp vyjšaŭ da svaich prychilnikaŭ i pačaŭ z čarhovaj zajavy ab tym, što rezultaty prezidenckich vybaraŭ u listapadzie 2020 hoda, pa vynikach jakich jon nie byŭ pieraabrany na druhi termin, byli padtasavanyja, piša Bi-bi-si.
Jon namiaknuŭ, što moža bałatavacca ŭ prezidenty treci raz. «My vyjhrali vybary dvojčy i, mahčyma, pryjdziecca zrabić heta ŭ treci raz», — skazaŭ sa sceny eks-prezident ZŠA.
Jaho ŭdzieł u nastupnych prezidenckich vybarach, u 2024-m, zaležyć ad taho, jak vyrašacca jurydyčnyja prablemy, ź jakimi sutyknuŭsia Tramp. U ofisie akruhovaha prakurora Manchetena advakatam Trampa paviedamili, što razhladajuć mahčymaść zaviadzieńnia kryminalnaj spravy ŭ dačynieńni da siamiejnaha biznesu Trampa.
Na mitynhu Tramp źviarnuŭsia da tem, pa jakich aktyŭna vykazvaŭsia i raniej, u pieršuju čarhu da prablemy rostu kolkaści mihrantaŭ, jakija traplajuć u krainu praź miažu ź Mieksikaj.
«Da nas u krainu pryjazdžajuć miljony ludziej. My paniaćcia nie majem, chto jany takija», — zajaviŭ były prezident, adznačyŭšy, što dziejańni Džo Bajdena procilehłyja tamu, što rabiła administracyja Trampa.
U administracyi Bajdena nazyvali mihracyjnuju palityku, jakuju pravodziŭ Tramp, biesčałaviečnaj. Choć ułasnyja płany Trampa zastajucca niavyznačanymi, jon zaklikaŭ prychilnikaŭ padtrymać respublikancaŭ, jakija buduć bałatavacca ŭ Pałatu pradstaŭnikoŭ i Sienat.
«My vierniem sabie Kanhres, vierniem sabie Amieryku, i zrobim heta ŭžo chutka», — skazaŭ jon.
Ciapier Demakratyčnaja partyja vałodaje minimalnaj bolšaściu ŭ abiedźviuch pałatach, ale na vybarach u 2022 hodzie jana moža jaho pazbavicca.
Paśla taho jak Tramp pakinuŭ Bieły dom, jon publična vystupaŭ tolki na mierapryjemstvach Respublikanskaj partyi. Mitynh u Ahajo staŭ dla jaho pieršym paśla sychodu z pasady prezidenta masavym mierapryjemstvam dla prychilnikaŭ.
U pryvatnaści, jon padtrymaŭ svajho paplečnika Maksa Milera, jaki maje namier vyłučyć svaju kandydaturu suprać kanhresmiena Entani Hanzalesa — adnaho z 10 respublikancaŭ, jakija hałasavali za impičmient Trampu paśla padziej u Kapitolii 6 studzienia 2021 hoda.
Jak čakajecca, Tramp paŭdzielničaje jašče ŭ dvuch mitynhach. Prychilniki eks-prezidenta, jak paviedamlaje «Rejter», spadziajucca, što takija mierapryjemstvy dapamohuć Trampu źjadnać Respublikanskuju partyju i zabiaśpiečać padtrymku kandydatam-adnadumcam byłoha prezidenta.
Kamientary