10 žniŭnia avijakampanija «Irakskija avijalinii» vykanaje evakuacyjny rejs ź Minska. Pra heta napisaŭ na svajoj staroncy ŭ tvitary pasoł Iraka ŭ Rasii i Biełarusi Abdułrachman Chamid al-Chusejni, paviedamlaje zerkalo.io.
«Kampanija «Irakskija avijalinii» arhanizuje evakuacyjny rejs dla irakskich hramadzian, jakija zastajucca ŭ Biełarusi» — napisaŭ jon. Pavodle paviedamleńnia, rejs zapłanavany na aŭtorak, 10 žniŭnia.
«Konsulskaja delehacyja pasolstva budzie prysutničać u ofisie kampanii «Irakskija avijalinii» i ŭ aeraporcie, kab pradastavić usie mahčymyja pasłuhi pavažanym hramadzianam», — napisaŭ pasoł.
Raniej Upraŭleńnie hramadzianskaj avijacyi Iraka (ICAA) na padstavie rasparadžeńnia ŭrada krainy admianiła ŭsie avijarejsy ŭ Minsk «da dalejšaha paviedamleńnia». Adnačasova dazvolena adpraŭlać pustyja samaloty ŭ Minsk, kab zabrać hramadzian Iraka dadomu.
6 žniŭnia ŭ Bahdad patelefanavali viarchoŭny pradstaŭnik ES pa zamiežnych spravach i palitycy biaśpieki Žazep Barel, a taksama ministry zamiežnych spraŭ Litvy Habryelus Łandśbierhis i Łatvii Edhars Rynkievičs. Padčas pieramovaŭ kiraŭnik irakskaj dypłamatyi Fuad Chusiejn raspavioŭ ab mierach, pryniatych dla abarony suhramadzian, jakija stali achviarami kantrabandnych sietak, u tym liku ab časovym spynieńni palotaŭ u Minsk i arhanizacyi zvarotnych rejsaŭ u Bahdad. Miery pryniatyja ŭ dadatak da rasśledavańnia vykarystańnia hramadzian u złačynnych metach i napadu na ich, paśla čaho niemahčyma vyśvietlić ich dalejšy los, adznačaje MZS Iraka.
Litva ŭchvaliła rašeńnie irakskich uładaŭ. «Vitaju rašeńnie ŭrada Iraka prypynić usie paloty ŭ Minsk. Tolki pracujučy razam my zmožam likvidavać sietki, jakija zajmajucca kantrabandaj ludziej u ES. Čakaju, što inšyja avijakampanii prypyniać paloty ŭ Biełaruś», — napisaŭ u tvitary ministr zamiežnych spraŭ Habryelus Łandśbierhis.
Ciapier čytajuć
U dzień, kali pamiłavali palitviaźnia Daronina, jahonaj žoncy prysudzili 8,5 hadoŭ kałonii za ŭdzieł u dvarovym čacie3
Kamientary