16 žniŭnia ŭ sudzie Zavodskaha rajona Minska vynieśli prysud Dźmitryju Bielikavu. Jaho pryznali vinavatym pavodle art.342 KK i asudzili da troch hadoŭ abmiežavańnia voli z nakiravańniem u papraŭčuju ŭstanovu adkrytaha typu (h.zn. «chimii»). Spravu razhledzieła sudździa Kaściukievič, paviedamlaje spring96.org.
Abvinavačany znachodzicca pad padpiskaj ab niavyjeździe.
U čym pryznali vinavatym?
Dźmitryja Bielikava pryznali vinavatym u tym, što 20 vieraśnia jon dałučyŭsia da mitynhu ŭ składzie hrupy z 800 čałaviek, pryniaŭ aktyŭny ŭdzieł u im, parušyŭ pracu transpartu, taksama jon mieŭ z saboj ściah. Heta paćvierdžana videazapisam, na jakim Bielikaŭ paznaŭ siabie. Pavodle vysnovaŭ dziaržabvinavačańnia, jon taksama błakavaŭ darohu, što, na dumku prakurora, taksama bačna na videazapisy. Udzieł mužčyny ŭ masavym mierapryjemstvie paćviardžaje bilinh telefona. Dziaržabvinavaŭca taksama paličyŭ, što naŭmysny ŭdzieł u mierapryjemstvach paćviardžajecca tym, što ŭ telefonie abvinavačanaha znojdzienyja fotazdymki z roznych masavych mierapryjemstvaŭ.
Fakt masavaha mierapryjemstva ŭ toj dzień u tym miescy paćvierdžany rapartam supracoŭnika milicyi, a taksama abjavami ŭ telehram-kanałach.
Što kazali abvinavačany i advakat?
Dźmitryj Bielikaŭ pryznaŭ siabie vinavatym u aktyŭnym udziele ŭ padziejach, hrupavych dziejańniach, a taksama niepadparadkavańni zakonnym patrabavańniam supracoŭnikaŭ. Adnym z rečdokaŭ było pryznanaje listavańnie ź dziaŭčynami, padčas jakich u tym liku abmiarkoŭvalisia miesca sustrečy na mitynhu: mužčyna raspavioŭ, što jano było asabistym, kab pakazać, jaki jon małajčyna.
Jon raskajaŭsia i adznačyŭ, što bolš nikoli nie budzie tak rabić.
Advakat Bielikava adznačyŭ, što abvinavačańnie biazdokaznaje: čas znachodžańnia mužčyny na prajeznaj častcy abviarhajecca piśmovymi materyjałami spravy. Jon padkreśliŭ, što abvinavačany dałučyŭsia da mitynhu nieŭśviadomlena, kali vychodziŭ z kramy, ahulny čas jahonaha ŭdziełu ŭ mierapryjemstvie nie pieravysiŭ dziesiaci chvilin. Taksama advakat nahadaŭ, što niama dokazaŭ spynieńnia transpartu ŭ toj čas i ŭ tym miescy, dzie byŭ Bielikaŭ, a jahony fotazdymak źniaty z tratuara, a nie prajeznaj častki.
Śviedki pa spravie na sud nie źjavilisia.
Ciapier čytajuć
Što aznačaje rasśledavańnie Mižnarodnaha kryminalnaha suda dla Łukašenki i biełarusaŭ? Tłumačyć Kaciaryna Dziajkała9
Kamientary