Byłoha dypłamata asudzili na 10 hadoŭ za zdradu dziaržavie. Što viadoma?
Dniami vynieśli prysud Alaksandru Sakałoŭskamu — byłomu supracoŭniku Ministerstva zamiežnych spraŭ. Praces byŭ zakrytym. Abvinavačvańnie vielmi surjoznaje — zdrada dziaržavie.
«Naša Niva» pahavaryła sa znajomymi Sakałoŭskaha. Pa ich słovach, sprava suprać byłoha dypłamata nie źviazanaja z padziejami apošniaha hoda.
«Jaho zatrymali daŭno, zdajecca jašče ŭ 2019 hodzie, — kaža adzin ź siabroŭ Sakałoŭskaha. — Z taho času Alaksandr znachodziŭsia ŭ SIZA KDB. Jon viedaŭ, što jaho zatrymajuć, ale pra detali spravy nie raspaŭsiudžvaŭsia. Viadoma tolki, što heta źviazana ź niejkim jaho ŭčynkam ci to 10-hadovaj, ci to 12-hadovaj daŭniny, jaki jon ździejśniŭ, kali pracavaŭ konsułam u Litvie».
Byłyja kalehi Sakałoŭskaha raskazali «Našaj Nivie», što toj pracavaŭ na roznych pasadach u MZS, za miažoj i ŭ samim Ministerstvie, ničym asablivym nie vyłučaŭsia, byŭ aściarožnym, z tradycyjnymi dla MZS strymana-libieralnymi pohladami. «Zaŭsiody byŭ druhoj ci treciaj skrypkaj», — kažuć byłyja kalehi.
Taksama «čystyja» dypłamaty padazrajuć Sakałoŭskaha ŭ tym, što jon moh vykonvać rabotu i pa «sumiežnaj» linii, pad jakoj majucca na ŭvazie zadačy dalikatnaha i nie zusim dypłamatyčnaha charaktaru.
Razhladali spravu ŭ Viarchoŭnym sudzie. Sudździa Edhar Marcirasian pakaraŭ Alaksandra Sakałoŭskaha 10 hadami pazbaŭleńnia voli.
Nahadajem, apošniaja hučnaja sprava pa artykule ab zdradzie dziaržavie — praces nad Dzianisam Uradam, śpiecsuviazistam Hienštaba, jaki sfatahrafavaŭ list ministra ŭnutranych spraŭ ministru abarony i «adpraviŭ polskamu telehram-kanału». Urada pakarali 18 hadami pazbaŭleńnia voli. Pakarańnie adbyvaje ŭ kałonii ŭ Navapołacku, tam ža trymajuć eks-bankira Viktara Babaryku.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja115
Kamientary