Daradca Śviatłany Cichanoŭskaj Franak Viačorka adkazvaje na hałoŭnyja pytańni, jakija ciapier uźnikajuć u biełarusaŭ pra vizy, mihracyju i mahčymaści ŭ Litvie, Polščy, Estonii, Hiermanii i inšych krainach.
«Sapraŭdy situacyja składanaja. Bo zajaŭki na vizu pastupajuć non-stop, ich vielmi šmat, kansułaty nie spraŭlajucca, kolkaść supracoŭnikaŭ skaročanaja jašče paśla 2020 hoda. Tamu mnohija MZS rasstaŭlajuć pryjarytety, nie vydajuć turystyčnyja vizy. Vydajuć vizy tolki humanitarnyja, u nadzvyčajnych vypadkach, tym, chto palityčna represavany, — tłumačyć daradca Cichanoŭskaj. —
Litva ciapier budzie skancentravanaja na vydačy vizaŭ tym, chto cierpić ad palityčnaha pieraśledu. Kali vy adnosiciesia da hetaj hrupy, vy možacie źviarnucca da pravaabarončych arhanizacyj — da «Viasny», «Bajsoła», inšych inicyjatyŭ. Jany vam patłumačać, što rabić.
Kali kazać pra Estoniju. U Estonii nie było rašeńnia pra niavydaču vizaŭ, ale jany taksama vyrašyli rasstaŭlać pryjarytety i nie vydavać vizy ŭsim. Jany vydajuć u pieršuju čarhu vizy humanitarnyja. Nie było ŭ Estonii i rašeńnia pa nieprymańni biełaruskich studentaŭ. Naadvarot — tam jość niekalki prahramaŭ, jany čakajuć studentaŭ.
U Polščy taksama takaja situacyja — vydajuć najpierš vizy humanitarnyja. Ciapier Polšča zbolšaha zajmajecca ŭciekačami z Ukrainy. I tamu my padniali pytańnie, ci mahčyma, kab biełaruskich hramadzian, jakija znachodzilisia va Ukrainie, usprymali ŭ Polščy hetak sama, jak i ŭkraincaŭ. Było abmierkavańnie ŭ parłamiencie Polščy, ale pakul što dadatak da zakonaprajekta, jaki padtrymlivaje biełarusaŭ, nie prajšoŭ. My napisali list i paprasili pierahledzieć.
Vy ŭžo bačyli zajavu Niamieččyny, što jana budzie prymać uciekačoŭ ź Biełarusi. Taksama padtrymlivajuć Słavakija i inšyja krainy. Dla studentaŭ adkrytaja prahrama Kalinoŭskaha, univiersitety Łatvii i Rumynii čakajuć biełarusaŭ».
Viačorka kaža, što dla ich było niečakanym, što niekatoryja MZS abjavili pra źmieny praviłaŭ. Śviatłana Cichanoŭskaja sazvaniłasia ź ministram zamiežnych spravaŭ Čechii, pahavaryła z ambasadaram Estonii, ofis pravioŭ kansultacyi ŭ ministerstvach Litvy i Polščy. Viačorka pahavaryŭ z ambasadaram Jeŭrapiejskaha Sajuza Dzirkam Šubielem.
«My tłumačym, što Biełaruś i Łukašenka — heta roznyja rečy. Palityki pačynajuć razumieć roźnicu. Jany skarektujuć svaju palityku. My kažam pra toje, kab dźviery adčynialisia dla biełarusaŭ i začynialisia dla režymu», — zaznačaje Franak Viačorka.
Kamientary