Łukašenkaŭcy pryznali BYPOL i «Płan «Pieramoha» terarystyčnymi arhanizacyjami
Takoje rašeńnie vynies Viarchoŭny sud.
Pa zajavie Hienprakurora Andreja Švieda Viarchoŭny Sud pryznaŭ arhanizacyju «BYPOL», jakaja abjadnoŭvaje siłavikoŭ, sa strukturnymi padraździaleńniami «Situacyjna-analityčny centr» i «Mabilizacyjny płan «Pieramoha» terarystyčnaj.
Paviedamlajecca, što dziejnaść BYPOL źviazanaja z «farmavańniem u hramadstvie idej radykalizmu i schileńniem hramadzian da ekstremisckaj dziejnaści dla źmianieńnia kanstytucyjnaha ładu».
Hienprakuratura padkreślivaje, što z 30 žniŭnia dziejnaść BYPOL na terytoryi Biełarusi zabaronienaja. Udzieł u joj paciahnie nastupleńnie kryminalnaj adkaznaści.
Raniej pa zajavie Švieda terarystyčnaj arhanizacyjaj pryznali «niefarmalnuju arhanizacyju» «NEXTA» ź jaje «strukturnymi padraździaleńniami» «NEXTA Live» i «LUXTA».
«Z maja 2021 h. BYPOL vykarystoŭvajecca z metaj abjadnańnia prychilnikaŭ biez uliku ich prynaležnaści da siłavych viedamstvaŭ, farmavańnia ŭ ich radykalnych pohladaŭ dla nastupnaha ich skłanieńnia da ździajśnieńnia ekstremisckich dziejańniaŭ (u tym liku aktaŭ teraryzmu)», — paviedamlała prakuratura.
BYPOL — inicyjatyva siłavikoŭ za svabodnyja vybary i adnaŭleńnie zakonnaści ŭ krainie. Jaje kiraŭnik Alaksandr Azaraŭ uvajšoŭ u Kabiniet, stvorany Śviatłanaj Cichanoŭskaj, u jakaści pradstaŭnika pa biaśpiecy.
U płan «Pieramoha», pa słovach kiraŭnika «Bajpoła», zapisałasia kala 200 tysiač čałaviek, heta padpolščyki, jakija znachodziacca ŭ Biełarusi i čakajuć kamandy.
Udzielniki płana «Pieramoha» dzielacca na try asnoŭnyja hrupy, raspaviadaŭ Alaksandr Azaraŭ. Pieršaja — asoby, jakija prajšli padrychtoŭku ŭ BYPOL i buduć vykonvać śpiecyjalnyja dziejańni. Sutnaść hetych dziejańniaŭ nie raskryvajecca, kab nie byli padrychtavanyja kontrmiery z boku śpiecsłužbaŭ.
Druhaja hrupa — supracoŭniki zavodaŭ i pradpryjemstvaŭ. Čakajecca, što jany vykanajuć zadańni na svaich pracoŭnych miescach.
Treciaja hrupa składajecca ź ludziej, jakija vyjduć na vulicy.
«Kožny hramadzianin musić razumieć svaju adkaznaść. Kali jon nie vyjdzie na vulicu, nie apuścić rubilnik, nie vykanaje pradpisańnie, jakoje atrymaje, to padstavić ludziej, jakija vykonvajuć siłavuju častku płana, što moža pryvieści da ich hibieli i źniščeńnia aktyŭnaj častki biełaruskaha hramadstva», — padkreśliŭ Azaraŭ.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary