U «Biełkalija» prablemy. Raspytali rabotnikaŭ fłahmana pra realny stan pradpryjemstva

U vieraśni na naradach i płaniorkach kiraŭnictva «Biełaruśkalija» narešcie pryznała krytyčnaść situacyi, raskazali «Našaj Nivie» šachciory. Da taho prablemy admaŭlali.

Kiraŭnictva «Biełaruśkalija» pryznałasia kalektyvu, što ekspart zastajecca na minimalnym uzroŭni. Ličby kiraŭnictva nie nazyvała, ale pa acency supracoŭnika «Biełkalija», ź jakim my havaryli, ciapier ekspart nie pieravyšaje 20 pracentaŭ ad byłych siarednich abjomaŭ. Hetyja kolkaści dastaŭlajucca ŭ Kitaj i Indyju čyhunačnym transpartam praz Rasiju.

Praciahvajecca i adhruzka techničnaj soli, jakuju rassypajuć u bihbehi i adpraŭlajuć u tuju ž Rasiju, ale dola takoj pradukcyi ŭ abarocie nikoli nie była vialikaja.

Rabočych abjadnańnia pa čarzie adpraŭlajuć na 2/3 ad taryfnaj staŭki (akłada) adpačyvać doma. Navat kiraŭničy skład sa «śviečki» — budynka ŭ centry Salihorska, dzie siadzić mieniedžmient pradpryjemstva, pavinien kožny miesiac «adbyvać» doma pa piać dzion.

Poŭnym chodam idzie i tak zvanaje «ŭskosnaje» skaračeńnie pracoŭnych miescaŭ. Ałharytm prosty — ludzi vychodziać pa ŭzrostu na piensiju ci zvalniajucca (ich zvalniajuć) pa roznych pryčynach, a na ich miescy nikoha nie nabirajuć, štat niaŭchilna skaračajecca. Heta častka mieraŭ pa aptymizacyi vydatkaŭ «Biełkalija».

Akramia taho, možna ŭzhadać, što dva hady nie zakupajecca novaje abstalavańnie, na što składanaja miechanika i elektronika, a taksama technična-inžyniernaje hornaje abstalavańnie reahujuć bolš častymi avaryjami. Drot, prychvatka, «koł» i izastužka — kłasičnyja pamahatyja pieršych šachcioraŭ Salihorska, aktualnyja znoŭ.

Tak zvanaja padziemnaja «elita» — zdabytčyki — apuskajucca ŭ zaboj u asnoŭnym dla taho, kab pierasunuć hidraŭličnyja krepi i vykanać minimum prafiłaktyčnych prac, bo ad padziemnaha pastajannaha cisku moža zadušyć łavy i prachodčyja štreki. Kali jašče paru hadoŭ tamu šachcior z udarnaj zabojnaj bryhady zarablaŭ pad 5000 rubloŭ, ciapier jon nie atrymlivaje i dźvie. I chacia hetaja ličba i ciapier vyhladaje salidnaj u paraŭnańni ź inšymi pradpryjemstvami Biełarusi, treba razumieć, što takich zabojščykaŭ praparcyjanalna da ŭsich pracujučych u «Biełkalij» — mizier.

Ramontniki, mantažniki, fabryka pierapracoŭki, absłuhoŭvajučy piersanał i inšyja dapamožnyja słužby zaŭsiody zarablali značna mienš. Tamu, adpaviedna, i ŭ hetaj situacyi i ich zarobki ŭpali.

Pavialičyć

U vyniku padzieńnia zarobkaŭ paskarajecca pracoŭnaja emihracyja salihorcaŭ u Jeŭropu. «Biełkalij» na kaleniach, što ja tam budu čakać», — tak acharaktaryzavaŭ situacyju «Našaj Nivie» adzin z takich.

Administracyja Alaksandra Łukašenki źviazvaje nadziei z pabudovaj porta pad Pieciarburham dla ekspartu biełaruskaha kaliju ŭ abychod Litvy.

Adnak ci nie vyjdzie tak, što ŭ adkaz na dalejšuju eskałacyju vajennych dziejańniaŭ va Ukrainie suśvietnaja supolnaść uviadzie jašče bolš žorstkija abmiežavańni? Takuju dumku vykazaŭ nam adzin ź inžynieraŭ «Biełaruśkalija». Na jahonuju dumku, stabilnaja praca harantavana adnaviłasia b u vypadku narmalizacyi palityčnaj situacyi ŭ krainie i dobrasusiedskich adnosin z krainami Jeŭropy.

• 84
• 0
• 13
• 7
• 6
• 7
• 11
• 0