«Biełaruski hajun»: Iranskija drony mohuć zapuskać ź biełaruskaj častki Čarnobylskaj zony
Manitorynhavaja hrupa «Biełaruski hajun», adhukajučysia na paviedamleńni ŭkrainskich krynic, što iranskich dronaŭ zapuskajucca ŭ Kijeŭskuju vobłaść Ukrainy z terytoryi Biełarusi, praanalizavała, adkul heta moža rabicca ŭ pryncypie. I pryjšła da vysnovy, što adzinaje miesca, jakoje dla hetaha padychodzić — biełaruskaja častka Čarnobylskaj zony.
U pošuku łakacyj «Biełaruskamu hajunu», jak adznačajecca, vielmi dapamahli vidavočcy, jakija fiksavali kirunak palotu dronaŭ na terytoryi Ukrainy.
Analiz hetych kirunkaŭ dazvoliŭ mocna zvuzić koła pošuku, i ŭ vyniku analityki pryjšli da vysnovy, što kali drony-kamikadze sapraŭdy zapuskajucca ź Biełarusi, to jość tolki adna terytoryja, dzie heta moža adbyvacca — Biełaruski siektar zony adčužeńnia Čarnobylskaj AES (Paleski radyjacyjna-ekałahičny zapaviednik).
Spryjaje hetamu toje, što bolšuju častku hoda hety zapaviednik — faktyčna zakrytaja terytoryja. Tam niama nikoha, akramia achovy, i jość miescy, dzie nie łović navat mabilnaja suviaź, nie kažučy ŭžo pra internet.
Dziakujučy spadarožnikavym zdymkam atrymałasia vyznačyć taksama niekalki zonaŭ, dzie bačnyja minimalnyja źmieny na miascovaści za apošnija niekalki miesiacaŭ.
Pieršaje — heta Ułasy, likvidavanaja vioska ŭ Chojnickim rajonie ŭsiaho za 4,5 km ad miažy z Ukrainaj.
Na spadarožnikavych zdymkach vidać, što ŭ apošnija miesiacy tam źjavilisia prataptanyja darožki, trochi rasčyščanyja darohi dla prajezdu i, vierahodna, vysiečanyja kusty. Hetaja vioska znachodzicca ŭ samaj hłuchmieni, tamu tam prosta niama nikoha, chto b moh paviedamić pra mahčymy zapusk. Adlehłaść da najbližejšaj žyłoj vioski Dvor-Savičy (Brahinski rajon) składaje amal 20 km.
Druhoje miesca — Kažuški, taksama likvidavanaja vioska ŭ Chojnickim rajonie.
Pobač vyrazna bačnyja novyja darohi, a značyć, tam pastajanna i časta jeździć technika.
Kamientary