8 listapada ŭ 00:00 źjaviłasia novaje abmiežavańnie — praz pamiežnyja punkty propusku nielha prajazdžać na samakatach. Pra heta paviedamili čytačy vydańnia «Aŭtahrodna».
U Dziaržaŭnym pamiežnym kamitecie vydańniu paviedamili, što siońnia, 8 listapada, z nula hadzin pamianiali technałahičnuju kartu propusku: na elektrasamakatach praź miažu nielha.
Z čym mienavita źviazana abmiežavańnie na prajezd praz punkty propusku na samakatach — dakładna nieviadoma.
Možna mierkavać, što ŭskosna da hetaj zabarony majuć dačynieńnie novyja praviły darožnaha ruchu, jakija ŭstupili ŭ siłu z 27 kastryčnika. U papraŭkach da pravił havorycca, što elektrasamakaty, hiraskutary i siehviei nie ličacca transpartnymi srodkami, a ich karystalniki pryraŭnoŭvajucca da piešachodaŭ.
Što tyčycca rovaraŭ, to pa novych PDR jany praciahvajuć zastavacca transpartnymi srodkami, i pierasiakać na ich punkty propusku pa-raniejšamu možna.
Raniej hrodziency nieadnarazova raskazvali, nakolki zručna jeździć za miažu na elektrasamakatach — u ahulnych čerhach stajać nie treba, zapas chodu dasiahaje 50 km, a zaradžacca dajuć na luboj zapraŭcy. Akramia taho, elektrasamakat zručna składvajecca i źmiaščajecca ŭ spadarožny aŭtamabil albo hramadski transpart.
Kamientary