Śviatary naviedali Čyrvony kaścioł. Što jany tam pabačyli
19 śniežnia ŭpaŭnavažany pa spravach relihii i nacyjanalnaściej Anatol Rumak, pradstaŭniki Minharvykankama, KUP «Minskaja spadčyna», pradstaŭnik MNS, a taksama z boku Kaścioła — nuncyj Ante Jozič, mitrapalit Juzaf Stanieŭski, ksiondz-kanonik Juryj Sańko, ksiondz-kanonik Ihar Łašuk, probašč parafii ksiondz-kanonik Uładzisłaŭ Zavalniuk i niekatoryja inšyja śviatary pryjšli ŭ kaścioł dla ahladu ciapierašniaha stanu śviatyni.
Sa śviedčańniaŭ śviataroŭ i tych, kamu ŭdałosia ŭvajści ŭ kaścioł, vyjaviłasia nastupnaje.
U zale dla bohasłužeńnia niama śladoŭ uzharańnia, dymu i sažy — kaścioł čysty i pryhožy, prydatny dla nabaženstvaŭ.
U kaściole ciopła, batarei haračyja (pry hetym va ŭsich listach, jakija parafijalny kamitet atrymlivaŭ ad dziaržaŭnych ustanoŭ, paviedamlali, što aciapleńnia ŭ kaściole niama).
U sakrystyi ahniom paškodžany klenčnik i kryž nad im, jakija znachodziacca jakraz nasuprać raźbitaha vitražnaha akna. U stoli nad Kryžam vybita dzirka (prykładna 40ch40 sm).
Va ŭsim kaściole, halerei i padvałach nie adčuvajecca ŭvohule pachu dymu, usiudy čysta i ciopła, mnostva žyvych vazonaŭ.
Na dumku vidavočcaŭ, patrebny ramont tolki sakrystyi, jaki možna vykanać u karotki termin. I parafija hatova zrabić jaho za ŭłasnyja srodki (achviaravańni viernikaŭ).
Razam z tym KUP «Minskaja spadčyna» patrabuje zakryć kaścioł na ramont, praciahłaść jakoha navat nie vyznačana.
Nočču 26 vieraśnia ŭ kaściole adbyŭsia pažar. U toj ža dzień administracyja Maskoŭskaha rajona pryniała rašeńnie časova zabaranić ekspłuatacyju budynka. Kaścioł adklučyli ad usich kamunikacyj. Minharvykankam zajaviŭ, što ŭładalnik budynka, KUP «Minskaja spadčyna», nie moža vykonvać abaviazacielstvy pa damovie, i zapatrabavaŭ ad relihijnaj abščyny vyzvalić budynak ad ruchomaj majomaści dla praviadzieńnia ramontna-adnaŭlenčych rabot.
Zatym nabaženstvy parafii byli pieraniesienyja ŭ Kafiedralny kaścioł na płoščy Svabody, a administrataram kaścioła byŭ pryznačany Juryj Sańko.
Ciapier čytajuć
Pamiatajecie čynoŭnika, jakoha kreatyŭna admazali ad zabojstva čałavieka na palavańni? Jon admazaŭsia znoŭ5
Kamientary