«Ukrainskaja praŭda»: Va Ukrainie čakajecca adstaŭka ministra abarony, im moža stać kiraŭnik raźviedki Budanaŭ
Krynicy ŭpłyvovaha ŭkrainskaha vydańnia paviedamili pra mahčymyja pierastanoŭki ŭ vajskovych viedamstvach Ukrainy, jakija mohuć zdarycca ŭžo na nastupnym tydni.
Adznačajecca, što ciapier kamanda Zialenskaha dumaje, kudy pieravieści Reźnikava, bo «ni ŭ koha ŭ Ofisie prezidenta Ukrainy niama sumnievaŭ, što jon pavinien zastacca ŭ kamandzie».
Razhladajecca varyjant, što Reźnikaŭ stanie novym ministram justycyi. Pa danych UP, dziejnaha ministra Dzianisa Maluśku mohuć adpravić pasłom Ukrainy ŭ adnu ź jeŭrapiejskich krain.
Da svajoj palityčnaj karjery Alaksiej Reźnikaŭ byŭ viadomy jak juryst i advakat.
Pasadu ministra abarony Ukrainy, pa źviestkach krynic «Ukrainskaj praŭdy», chutčej za ŭsio zojmie Kiryła Budanaŭ. Paviedamlajecca, što jon užo šukaje sabie zamienu ŭ Hałoŭnym upraŭleńni raźviedki.
«Kiryłu vielmi ciažka sychodzić z HUR, jon nie choča ŭ MA, tamu što razumieje, što heta vializnaja biurakratyčnaja mašyna. Ale razvažać času ŭžo asabliva niama», — tłumačyć krynica UP siarod ukrainskich siłavikoŭ.
U intervju «Ukrainskaj praŭdzie» Alaksiej Reźnikaŭ zajaviŭ, što hatovy da luboha raźvićcia padziej, ale nijakich razmoŭ pra adstaŭku ź im nie viałosia.
Infarmacyja pra mahčymuju adstaŭku ministra abarony Ukrainy źjaviłasia paśla skandału z zakupkaj praduktaŭ dla USU pa zavyšanych cenach. Svaje pasady stracili namieśnik ministra Viačasłaŭ Šapavałaŭ i v. a. načalnika departamienta, adkaznaha za zakupki ŭzbrajeńnia i techniki dla USU, Alaksandr Lijeŭ.
Pratasievič znoŭ ženicca — ciapier z tarołaham Nastaśsiaj, jakaja pracavała ŭ elitnym miedcentry «Miersi»40
Kamientary