Biełaruskaj asacyjacyi žurnalistaŭ staŭ viadomy jašče adzin vypadak pazasudovaha pazbaŭleńnia niedziaržaŭnaha miedyja damiena .by u biełaruskim siehmiencie internetu. Hetym razam pad «začystku» trapiła redakcyja infarmacyjnaha internet-resursu ex-press.by, jaki raskazvaje pra padziei ŭ Barysavie i Žodzinie.
Niejki čas tamu ŭładalnica damiennaha imia ex-press.by atrymała elektronny list z Apieratyŭna-analityčnaha centra — jašče adzin anałahičnaha źmiestu, miarkujučy pa «šapcy», pradublavany na adrac Biełaruskich vobłačnych technałohij.
Tema dopisu infarmavała «ab pryniaćci mier reahavańnia AAC u miežach vykanańnia funkcyj administratara nacyjanalnaj damiennaj zony, a taksama pa vynikach razhladu lista TAA «Biełaruskija vobłačnyja technałohii» ŭ jakaści rehistratara».
U dopisie za podpisam namieśnika načalnika kantrolnaha viedamstva Siarhieja Žarnasieka davodziłasia, što ŭ centralizavanaj bazie danych ab damiennych imionach źmiaščajucca źviestki pra ex-press.by, uładalnikam jakoha ŭkazany indyvidualny pradprymalnik. Spasyłajučysia na prezidencki ŭkaz ad 18 vieraśnia 2019 hoda № 350 «Ab asablivaściach vykarystańnia nacyjanalnaha siehmienta sietki internet» čynoŭnik adznačaje: asoby, jakija pradstaŭlajuć źviestki dla farmavańnia bazy danych, musiać ukazvać praŭdzivuju infarmacyju i pry nieabchodnaści paćviardžać jaje dakładnaść.
U jakaści «žaleznaha arhumienta» pradstaŭnik dziaržaŭnaha administratara adsyłaje da punkta 27 instrukcyi ab rehistracyi damiennych imionaŭ, zaćvierdžanaj zahadam usio taho ž AAC ad 18 červienia 2010 hoda №47, što ŭładalnik damiena abaviazany ŭ termin da siami pracoŭnych dzion pa zapycie rehistratara padać dakumienty, jakija paćviardžajuć dakładnaść infarmacyi, uniesienaj u bazu danych.
Pavodle jaho słoŭ, rehistratar svaim listom ad 20 sakavika 2023 hoda nakiravaŭ uładalniku damiena na elektronnuju poštu, a taksama na paštovy adras paviedamleńni ab nieabchodnaści padać dakumienty z paćviardžeńniem dakładnaści źviestak u bazie danych. Pryčym, uładalnik damiena musić heta zrabić «javačnym paradkam» — to bok pryjści ŭ ofis z pakietam dakumientaŭ. Adnak aŭtary partała znachodziacca za miažoj.
Pakolki na apaviaščeńni ŭ vyznačany termin adrasat nie adreahavaŭ, sa spasyłkaj na punkt 48 unutranaj instrukcyi Siarhiej Žarnasiek kanstatuje: niepradstaŭleńnie ŭładalnikam damiena pa zapycie rehistratara paćviardžalnych dakumientaŭ źjaŭlajecca parušeńniem paradku rehistracyi damiennaha imia.
I na hetaj padstavie pryniataje rašeńnie prypynić delehavańnie damiennaha imia infarmacyjnamu resursu ex-press.by.
AAC pačaŭ pazbaŭlać «ekstremisckija» ŚMI damiennaha imia ŭ Biełarusi — BAŽ
Ciapier čytajuć
Byłoha supracoŭnika kontrraźviedki KDB aryštavali za zdradu dziaržavie9
Kamientary