«My razumiejem, što heta ciapier pytańnie vyžyvańnia». Ukrainski ombudsmien raić ukraincam na akupavanych terytoryjach brać rasijskija pašparty
Ukraincy, jakija ciapier znachodziacca na časova akupavanych terytoryjach, dla zachavańnia ŭłasnaha žyćcia pavinny brać rasijskija pašparty. Taksama im varta lubymi sposabami vyjazdžać z takich terytoryj, zajaviŭ upaŭnavažany Viarchoŭnaj Rady Ukrainy pa pravach čałavieka Dźmitryj Łubiniec u efiry nacyjanalnaha telemarafonu.
Dźmitryj Łubiniec miarkuje, što niadaŭni ŭkaz Uładzimira Pucina, jaki dazvalaje departavać z časova akupavanych terytoryj ukraincaŭ, što nie pryniali rasijskaje hramadzianstva, nakiravany dakładna nie na departacyju.
«Hety ŭkaz nakiravany na toje, kab uzakonić prymusovuju pašpartyzacyju, jakaja adbyvajecca na časova akupavanaj terytoryi Ukrainy. Heta pieršaje. I druhoje — zafiksavać i pastavić kropku ŭ hetym pracesie. Ja dumaju, što ŭsie hramadzianie Ukrainy, jakija admoviacca ad rasijskaha pašparta, ich prosta aryštujuć. I heta budzie asobnaja katehoryja cyvilnych zakładnikaŭ, jakich Rasijskaja Fiederacyja budzie trymać u pałonie, u źniavoleńni na svajoj terytoryi abo na časova akupavanaj terytoryi Ukrainy», — zajaviŭ ombudsmien.
Jon taksama adznačyŭ, što Ukraina budzie praciahvać niepryznańnie rasijskich pašpartoŭ, jakija ciapier vydajucca pad takim fizičnym ciskam hramadzianam Ukrainy na časova akupavanaj terytoryi.
«Ja b paraiŭ brać rasijski pašpart, usio ž dla siabie pryniać rašeńnie vyžyć. Heta samaje hałoŭnaje. My razumiejem, što heta adbyvajecca pad ciskam, fizičnym ciskam. Tamu ŭziać pašpart, vyžyć, dačakacca, kali my vyzvalim hetuju terytoryju.
Paśla hetaha, ciapier napracoŭvajecca adpaviedny zakon, — aficyjna admovicca ad hetaha pašparta i viarnucca da narmalnaha žyćcia. Abo dla siabie prymać rašeńnie i vyjazdžać z hetaj terytoryi lubym sposabam, praź lubuju terytoryju inšych krain, ale prosta adtul źjechać. My razumiejem, što heta ciapier pytańnie vyžyvańnia na hetaj terytoryi», — skazaŭ ombudsmien.
Łubiniec padkreśliŭ, što rasijanie prymusovaj pašpartyzacyjaj ździajśniajuć novaje, asobnaje vajennaje złačynstva.
«I ŭ hetym razrezie ja publična, jak ombudsmien Ukrainy, kažu, što my jak Ukraina, jak dziaržava, nie pryznajom rasijski pašpart jak elemient učynieńnia złačynstva našymi hramadzianami.
Znoŭ ža, u hetym razrezie ŭ nas hučali takija zajavy, što luby, chto ŭziaŭ rasijski pašpart na časova akupavanaj terytoryi, my pavinny da jaho prymianić niejki ŭpłyŭ, mahčyma, navat kryminalnaha charaktaru. Ja kateharyčna suprać hetaha. Našy hramadzianie heta robiać dla taho, kab vyžyć», — adznačyŭ Łubiniec.
Čytajcie taksama:
Stołtenbierh: Vajennaj mocy Kijeva dastatkova dla vyzvaleńnia akupavanych terytoryj
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona
Kamientary